KHAWTHLIR

CM leh Union MoS

Chief minister Zoramthanga leh Union minister of state for External Affairs & Culture Meenakshi Lekhi-i te chu May 22, Thawhṭanni tlaiah khan CMO-ah an inkawm a; Mizoram chu international border-in a hual vel ram a nih angin rambung pawimawh tak a nih thu leh hmasawnna hnathawh kawngah remna leh muanna a awm a ṭul thute an sawi.

Thisen pe

Institute of Advanced Studies in Education chuan nimin khan blood donation camp huaihawtin, ZMC blood bank tan thisen unit 44 an pe a, petute mipa 35 leh hmeichhia pakua an ni. Central Higher Secondary School NSS pawhin nimin khan Civil Hospital, Aizawlah thisen unit

Remna Ni

Lawngtlai District Remna Ni Celebration Committee chu nimin khan addl. DC Abraham Beirazi Khithie hoin an ṭhukhawm a; June 30, 2023 - Remna Ni pualin free health camp, digital flyer leh video tawi insiamsiak, faina beihpui thlak, peace walk leh a thlawna thisen pek runpui neih an rêl.

Cancel leh

MPCC president Lalsawta'n MPCC general secretary atana treasurer aṭanga bang ta Zodintluanga, MLA a ruatna chu cancel leh a ni. MPCC President hian Zodintluanga hi May 22, Thawhṭanni khan general secretary atan a ruat a, Zodintluanga'n a duh loh avangin hemi ni vêk hian cancel leh a ni.

HSLC pass lawm

Vairengte High School-II chuan nimin khan an sikul aṭanga HSLC Examination 2023-a pass-te lawmpuina hun an hmang a, bialtu MLA Lalrinsanga Ralte-in a hmanpui. Vairengte H/S-II ah hian HSLC exam hmachhawntu zirlai 53 zinga 46 an pass a, pass percentage 86.79% a ni. MLA chuan, Serlui biala HSLC distinction-a pass-te chu laptop a pêk zêl tur thu leh top 10-a langte chu scooter a pek zel tur thu a sawi.

Laptop hlan

Assembly deputy speaker H Biakzauva chuan nimin khan a pisaah a bial chhunga HSSLC examination 2023-a top 10-a lang zirlai pathum hnenah lawmpui nan laptop pakhat ṭheuh a pe a, an kal zelna turah duhsakna a hlan nghal.

Editor thi

Mizorama chanchinbu hlun zinga mi Aizawl Observer editor E Lalhleia (86) h/o H Lalnunmawii, Maubawk, Aizawl chu nimin chawhnu dar 2:53 khan Trinity Hospital-ah a thi a, vawiin chhun dar 12 hian vui a ni ang.