Green Mizoram Day pualin Tlawng hnarah thingphun rêl

Lunglei District Level Committee on Green Mizoram, 2023 chuan nimin khan additional DC Donny Lalruatsanga kaihhruaiin DC conference hall-ah Green Mizoram Day hman dan tur rêl a; Lunglei - Haulawng inkar kawngpui dungah leh a remchan dan angin Tlawng lui hnarah thingphun ni se, an ti.

Ṭhukhawm chuan June 9, 2023 - Green Mizoram Day chu Pukpui Centenary Lungleiah hman ni se, khuallian atan Lunglei district-a MLA remchang sawm ni se an ti a; kum 2023-a kângmei veng ṭha khuate hnenah lawmman sem an rêl. Kângmei veng ṭha khua pathum bakah, consolation prize dawng turin khua pathum thlan chhuah ni se, an ti bawk.

He huna tarlan danin, Green Mizoram Day 2022 khan Lungleia Mizoram Polytechnic hmunah thing ṭiak 476 phun a ni a, heng zinga 80% vel a nungin, mi hrang hrang leh pawl hrang hrang hnenah thing ṭiak 6,856 sem a ni.

Kum 1999 aṭanga 2022 chhungin Green Mizoram Day-ah hian thing ṭiak 13,126 phun tawh niin, 50% a nung a, thing ṭiak phun tur 5,67,443 sem chhuah a ni tawh.