Tun term hi tuarchhel hun a ni; term thar hi malsawmna hun a ni dawn - Zoramthanga

Serlui MNF Joint Block chuan nimin khan Vairengte Multipurpose Hall-ah block conference an hmang a, an hun hmanpuitu MNF presi­dent Zoramthanga, chief minister chuan sorkar term an hman mek chu harsatna hrang hrang tawh kum a nih vangin tawrh chhel a ngai tiin sorkarna an chan leh chuan, "Chu hun chu malsawmna hun a ni dawn," a ti.

Zoramthanga chuan Covid-19 curfew karah an tum lian ber chu dam khawchhuah a ni tawp tih sawiin, "Tun term kal mek hi tuarchhel hun a ni. Pathian leh mipui zarah sorkarna kan siam leh ngei anga, chu hun chu malsawmna hun a ni dawn," a ti a, Mizoram tan hmasawnna, mal­sawmna tinreng dawn hun a thleng thuai dawn niin a sawi.

MNF-in atir aṭanga Laldenga hoa an thu­thlung leh tun thlenga an thupui chu 'Pathian leh kan ram tan' tih a nih thu sawiin MNF President chuan an dinna an sawh sawn ngai loh thu a sawi.

Zoramthanga chuan inthlan lo awm turah an party-in candidate-ah buaina an nei lo tih sawiin, "ZPM chuan green signal pek thuah an nei nual," a ti a, mi hrang hrangin an mi sawmte tiam an neih avangin tunah hian an buai phah niin a puh a; tunah hian MNF boruak a san thu a sawi.

MNF President chuan an party zawm thar zatte hi a dik takin an sawi thin tih sawiin, party thenkhat chu number dik lo puang ṭhinah a puh a; Serlui bial chu MLA ṭha tak an neih avangin, 'Tifuh in inti tawlh tawlh dawn," tiin bialtu MLA Lalrinsanga Ralte a fak.

MNF thuchhuah tarlan danin, Serlui MNF Joint Block conference-ah hian MNF President hian an party-ah mithar 798 a lawm lut.