Assam Rifles insawn dan tura rawtna Ministry of Home Affairs-in a la pawm lo
Aizawl khawpuia Assam Rifle-te insawn chhuah tur chungchanga Mizoram sorkar leh Assam Rifles-ten memorandum of understanding (MoU) an duan chhin (draft MoU) chu Ministry of Home Affairs (MHA)-in ala pawm lo.
Vanglaini thudawn danin, Assam Rifles leh Mizoram sorkar hian Aizawl khawpui aṭanga AR-te an insawn chhuah theihna atana ṭul leh pawimawh hrang hrangte duang dunin, an pahniha duh dan tarlan ve ve a nih hnuah draft MoU an ziak.
Draft MoU hi MHA hnenah thawnin, an thawnna hi rei tawh mah se, MoU chungchangah hian Assam Rifles chuan tun thlengin MHA aṭang hian thu dawn an la nei lo. Draft MoU hi MHA-in ṭha an tiha an pawm theih hunah MHA leh Mizoram sorkarin MoU an ziak ang.
Hetihlai hian, Assam Rifles-te chuan Aizawl khawpui chhunga an hmun aṭanga Zokhawsanga an insawn hunah pawh tuna an luah ram hi chhuahsan kim vek an tum lo.
Thu dawn danin Assam Rifles-te hian insawn chhuak tur chuan kum hnih leh a chanve vel mamawhin an inhria a; hei bakah hian an chhuah fel hmain draft MoU-a Mizoram sorkar tih tura tarlante tihhlawhtlin vek an phût bawk ang.
Assam Rifles-te hian Aizawl khawpuia an hmun chhuahsan loh tura an duh zingah hian Quarter Guard leh Loch House-te a tel a; hei bakah hian Zokhawsangah sikul din a nih hma chuan Lammual bula an sikul chu chhuahsan an tum lo.
Assam Rifles-te hian tun dinhmunah Zokhawsang panna kawng chu ṭha tawk loa an hriat bakah, insawn phei vek turin tui leh power supply an mamawh khawp sorkarin a ruahman sak loah an ngai a, hengte hi Mizoram sorkarin a chinfel sak loh chuan insawn chi niin an ngai lo tih Vanglaini chuan thu a dawng.