Sorkar hnathawkte rilru put hmang chu mipui hmasawnna a ni tur a ni - Union Minister

Union minister of state for External Affairs & Culture Meenakashi Lekhi-i chuan May 23, Thawhlehni khan Mamit district a tlawh a, DC conference hall-ah Mamit khawpuia sorkar hotute nen an inkawm. Union MoS chuan, "Sorkar hnathawkte rilru puthmang chu mipui hmasawnna a ni tur a ni," a ti.

Meenakashi Lekhi-i chuan, Aspirational district, Mamit-a awm sorkar hnathawkte chu mipui tan theihtawp chhuah turin a fuih a, "Sorkar hnathawkte rilru puthmang chu mipui hmasawnna a ni tur a ni. Mipui ta kan nih angin ram leh mipuite tan theihtawp chhuahin hna thawk ang che u," a ti a, mipuite mamawh hriat tuma rang taka chêt la ṭhin turin a chah.

Mamit chu plastic bawlhhlawh sawngbawl chungchangah fakawm a tih thu sawiin Union Minister chuan, "Plastic bawlhhlawh paih mai mai hmuh tur a tlem a, a lawmawm hle. Chutihrualin, nakin hun zelah plastic bawlhhlawh management kawngah Mamit khawpuiin buaina a neih loh nan DUDO office kaltlangin tun aṭanga ruahmanna ṭha tak siam theih ni se," a ti.

Sorkar hotute pawhin Union Minister hnenah hian Mamit district-a health services, tui harsatna, zirna bakah kawng hrang hranga harsatna an neihte an thlen a; Meenakashi Lekhi-i chuan sutkian a nih theih nan thuneitute hnenah a thlen tur thu hrilhin, an harsatna hrang hrang sutkian nan India rama state dangte tih dan a theih ang anga entawn a, zawm ve turin a chah nghal.

Union Minister hian Govt. Mamit College a tlawh nghal bawk a, Aizawl aṭangin protocol officer leh Art & Culture department hotute'n an ṭawiawm a ni.