Manipur raltlante sikul luhtir turin ti

Mizoram sorkar chuan Manipur aṭanga sahimna zawnga Mizorama rawn lut zirlaite chu Mizoram sorkar sikulah leh sorkar ṭanpui sikulahte zirna chhunzawmtir turin hriattirna a tichhuak.

Hemi chungchangah hian School Education director Lalsangliana chuan nimin khan district education officer leh sub-divisional education officer-te bakah, higher secondary school thunei-tute hnenah lehkha a thawn a ni.

School Education Director tarlan danin, Manipur aṭanga sahimna zawnga Mizorama rawn tlanchhia naupangte'n zirna an chhunzawm theih nan an awmna district leh khuaa sikulte chu an sikulah lo luhtir tura hriattir an ni a; sorkar sikul bakah, mimal sikulte pawh ngen an ni.

Sorkar chhinchhiah danin, May 23, 2023 tlai dar 5 thleng khan Manipur aṭangin Mizoramah raltlan mi 7,663 an awm mek. Raltlan zingah hian naupang sikul kal rual eng emaw zat an awm a ni.