SLANTF-in sikul zirlaibuah ruihhlo dona lam inzirtirna telh an duh

State Level Anti-Narcotics Task Force (ANTF) chu nimin khan DGP Conference Hall-ah an chairman, Veenu Bansal, IGP (Intelligence) hoin an ṭhukhawm a; sikul zirlaibuah ruihhlo dona lam inzirtirna telh an duh thu an sawi.

Ṭhutkhawm hi Excise & Narcotics commissioner Ngurchungnunga Sailo in a kaihruai a, ruihhlo do kawnga hmalak dan tur hrang hrang an sawiho a; ruihhlo man tur kawhhmuhtu (informer) leh a mantu officer-te tan sorkar laipui hnuai Narcotics Control Bureau aṭanga lawmman (reward) hmuh theih a nih thu leh mi pali hnenah lawmman pek a nih tawh thu tarlan a ni.

Ṭhukhawm chuan ruihhlo do nan Nasha Mukt Bharat Abhiyan (NMBA) hnuaia ‘drugs awareness campaign’ kalpui mek chu chhun­zawm zel ni se, an ti. Excise & Narcotics department-in ruihhlo chungchanga mitin biak pawh theih tura an siam - Narcotics Call Centre, Excise & Narcotics department website-a tarlan chu ṭangkai zawka mipuiten an hman an duh thu leh sikul zirlaibuah ruihhlo dona lam inzirtirna telh an duh thu an sawi.

Mizoram sorkar hnuaia ‘Core Committee on Ruihhlo Do’ aṭanga SLANTF-in ruihhlo dona atana an sum hmuh hman dan tur thlirhona neih nghal niin, an dawn chhan ang ngeia dik taka hman ṭha an tih thu an sawi bawk.

He hunah hian DIG (CID) Lalhuliana Fanai, DIG (NR) Lallianmawia, Aizawl SP Rex Zarzoliana, Police leh Excise & Narcotics officer-te bakah, BSF, FSL leh Drugs Controller aiawhte an tel a, district hrang hrang SP-ten online-in an chhim bawk a ni.