Mizoramin sorkar laipui scheme-te kan hmang ṭha tlangpui - Lok Sabha MP
Hnahthial District Development Coordination & Monitoring Committee (DISHA) chu nimin khan an chairman C Lalrosanga, Lok Sabha MP kaihhruiin Govt. Hnahthial College conference hall-ah an ṭhukhawm a; MP chuan sorkar laipui scheme-te chu Mizoramin a hmang ṭha tlangpui niin a sawi.
C Lalrosanga chuan, DISHA meeting chu sorkar laipui scheme pawimawh zawng zawng thlirhona leh zirchianna a nih avangin sorkar laipuiin a ngaih pawimawh thu a sawi a, "Hmun hrang hranga ka kal kualnaah sorkar laipui scheme-te hi thingtlang mipuiten an chhawr ṭangkaiin, hmasawn nan an hmang. Mizoram hian kan hmang ṭha tlangpui a, lawmman dawng pha pawh an awm nual," a ti.
Sorkar laipui chuan 'Digital India' kaltlangin digitization a kalpui nasat thu sawiin Lok Sabha MP chuan, "Khawvelah hian a hmangtu tam lam aṭanga chhûtin hmahruaitu ni hialin a lang a, hemi kawngah hian sorkar department hotute intuaihriamin, staff-te training tir ngaih pawimawh a ṭul," a ti a, mipuite pawh kawhhmuh an ngaih thu a sawi.
C Lalrosanga chuan Hnahthial district-in hma a sawn chak hlea a hriat thu a sawi a, "Hmasawnna tur ruahmanna tam takte pawh a awm a, sum lamah harsatna intawkte pawhin ka ringa, theihtawp chhuah tlang zel tur kan ni. Hnahthial district-ah kum 2022 - 2023 chhungin IMR leh MMR an awm lo hi a lawmawm a, DISHA meeting neih tawhna district hrang hrangah 'nil' awmchhun a la ni," a ti a, thawktute chu ṭan la chhunzawm zel turin a ngen nghal.
NGO aiawhte chuan Hnahthial damdawi-in a gynecologist la awm loh avanga harsatna a awm thu an sawi a; MP chuan bawhzui a tum thu a sawi bakah, Social Welfare department hnuaia National Benefit Scheme kalpui chu mipuite hrilh hriatna kawngah ṭan la thar turin thawktute a ngen nghal bawk.
Hnahthial district-a central scheme dinhmun
▶ Ni 100 inhlawhna - MGNREGS job card holder 6,895 an awm mek a; kum 2022-23 chhungin ni 100 inhlawhna siam a ni.
▶ 3th & 4th Quarter 2022-23 chhungin MGNREGS Wage Component hnuaiah hna chi hrang 393 thawh a ni a, Wage Component hnuaiah hna 50 thawh a ni.
▶ Mi harsate insak ṭanpuina scheme, PMAY (G) hnuaiah beneficiary 206 awmin, chhungkaw 144 hnenah first instalment pek a ni tawh.
▶ Border Area Development Program (BADP) hnuaiah hna panga thawh mek a ni.
▶ Kum upa pension, IGNOAPS hnuaiah beneficiary 288, Widow Pension Scheme hnuaiah beneficiary 88 leh pianphung rualbanlo beneficiary 36 an awm mek.
▶ ICDS hnuaiah anganwadi 115 awm mekin, beneficiary 5,578 an awm.
▶ Eklavya Model Residential School (EMRS) dinna tur ram tihfel tawh niin, a building sak ṭan thuai tum a ni.
▶ BPL chhungkuate tana a thlawna gas connection pekna, PMUY hnuaiah beneficiary 175 an awm.
▶ AAY hnuaiah Card 663 leh PHH hnuaiah Card 2,697 a awm mek.
▶ NH-54 Upgradation hna kal mek - chainage km. 125 - 208 (package 3 & 4)-ah hna 68% zawh tawh a ni.
▶ Package 3 hnuaia kawng siam km. 40.20 a thui siam mek chu January 19, 2024-ah zawhfel hman beisei a ni.
▶ Package 4 hnuaia kawng siam km. 42.53 a thui chu October 21, 2023-ah zawh hman beisei.