Online hmanga inbumna a nasat avangin Police-in fimkhur turin mipui an ngen

Mizoram Police chuan thuchhuah siamin, digital payment systems hman uar a nih chhoh viau laiin hemi kaihhnawiha inbumna pawh nasa takin a sang chho chak hle tih an tarlang a, fimkhur turin mipui an ngen.

Hetianga internet khawvela bum tur zawng ho hian rinhlelh nachang hre lo leh bum awlsam tur zawngin, inbum dan thar an hmu chhuak reng tih tarlangin Mizoram Police chuan, "Tunah hian Mizorama cyber crime thubuai ziah luh zinga 75% aia tam hi online financial fraud kaihhnawih a ni," an ti.

Mizoram Police ngenna

◉ I banking password, OTP, debit card/credit card detail-te tumah hrilh suh.

◉ Pawisa dawngtu tur i nihin eng QR code mah scan suh. Pawisa thawn chhuaktu tur tan lo chuan engmah scan a ngai lo.

◉ Phishing scammer-te hian i bank leh UPI information pawimawh ruksak che an tum reng tih hria la, email leh website lemahte, link hriat chian lohahte lut mai mai suh ang che.

◉ Online-a thil i lei dawnin search engine aṭanga product zawn hi a him tawk lo ṭhin a, chuvangin online shopping website hriat chiansaah ngei thil enin lei ṭhin ang che.

◉ Engmah thawk mang loa pawisa hlawh theihna te, pawisa dah punna hlawk lutuk leh him si tih ang chi, thil ṭha uchuak lutuk ang hi inbumna a ni tlangpui tih hria ang che.

◉ Awlsam leh rang taka loan pe chhuak thei anga insawi application leh website lakah fimkhur ang che. Loan pe turin mimal thil pawimawh tinreng an dil a, hengte hi a hnua blackmail lehna atante an hmang ṭhin a ni. Loan app i hmang a nih pawhin RBI phalna nei an ni ngei em tih chian ang che.

◉ Police/army anga insawi a, thil tlawm tak taka tiral duh anga online-a inzuar ṭhinte hi misual an ni tlangpui tih hre bawk ang che.