CM-in PWD rest house a hawng

PWD enkawltu chief minister Zoramthanga chuan nimin khan Bilkhawthlira PWD rest house leh chowkidar quarter thar a hawng a, hmathlir (vision) ṭha tak neih a pawimawh thu sawiin, "Ram entawntlaka kan insiam dawn chuan tlachawp taka rorel emaw, tlachawp taka thil tih zel a chi loh," a ti.

Zoramthanga chuan, tun hnai kum engemawzat chhung chu thil chi hrang hrang - hri leng, lirnghing, kangmei, raltlan, ramri buaina leh thil dang dangin Mizoram a nghawng thu a sawi a, "Amaherawhchu history aṭangin indopui avanga ram tluchhia leh retheih phahte an intundin dan leh hausa taka an insiam chhoh leh dan khan hmu. Chutiang ang chuan keini pawh tumruhna nen hma lain, dinhmun ṭha zawk leh sang zawkah kan inhlang thei a ni tih a chiang," a ti a, dinhmun ṭha zawka ding leh thei tura inbuatsaih a ṭul thu a sawi.

Chief Minister chuan rest house leh a enkawltu chowkidar quarter hawn tak chu ṭangkai taka hman a nih ngei a beisei thu sawiin, "March 2020 khan ka hoin a sakna tur helai hmun kan lo thlithlai tawh a ni. Hripui lengin bumro mah se, vawiinah hetiang hun thlen a ni ta hi lawmawm ka ti hle," a ti.

He hunah hian bialtu MLA Lalrinsanga Ralte pawhin thu sawiin, "Hmasawnna ruhrel mamawh sorkara kan thlente chu health lamah a ni emaw, infiamna lamah a ni emaw, electrification leh thil dangahte sorkarin a lo ngaihtuah zel," a ti a, sorkar hmalaknate hi a hmangtute'n dimdawi taka an enkawl a beisei thu a sawi.

Rest house hawn inkhawmah hian Kolasib DC John LT Sanga, SP Lalrinawma Traite bakah, sorkar hotute leh Bilkhawthlir khawltang leh tlawmngai pawl hruaitute an tel.

Rest House leh quarter thar hi cheng nuai 412.39 senga sak a ni a, contractor chu Lalramsanga, Tanhril, Aizawl a ni. December 15, 2020-ah thawh ṭan niin, February 28, 2023-ah sak zawh an ni a; Rest House-ah hian ground floor-ah ordinary room 8, first floor-ah VIP room 2, ordinary room 7 leh lounge siam a ni.