Hlawhtling turin beih hram hram a ngai - TJ Lalnuntluanga

Pinehill Adventist Academy, Champhai chuan nimin khan Pinehill Futsal Ground-ah kumina an zirlai pawl 10 pass tharte tan Senior Class Presentation Day vawi 15-na an buatsaih a, minister of state TJ Lalnuntluanga'n a hmanpu a, zirlaite fuihin hlawhtling tura beih hram hram leh ṭanrual a ṭul thu a hrilh.

TJ Lalnuntluanga chuan, hlawhtlinna hmu thei tura tunhma aṭanga Pinehill Adventist Academy Champhai hmalaknate hriatpuitu a nih thu sawiin, "Hlawhtlinna hi thawk leh khata chan mai theih a ni lo a, beih hram hramna leh ṭanrualna avang chauha awm thei a ni," a ti.

Zirna chu kawng hrang hranga hmasawnna tura pawimawh a nih thu sawiin Minister chuan, "Zirlaiten tum bulbal tak neiin, ram leh hnam tana thawk thei leh chhawrnahawm ni thei turin ngaihtuahna dik leh ṭha nei ula. India rama zirna inelna leh exam lianthama lang pha thei turin tun aṭangin ngaihtuahna seng ang che u," a ti a; mahni kutkea ding thei turin a chah.

TJ Lalnuntluanga chuan zirlaite chu an zirlai pui theitu ni lo thil dangahte insum thiam tur leh social media hman chintawk nei turin a chah a, "Sakhuana leh hnam ziarang vawnhim duh lohna thinlung hi hnam ralna tur zia a ni a, dik lohna leh hlemhletna lakah fihlim tum ula, Pathian ṭihin ni tin inhlanthar ṭhin ang che u," a ti bawk.

He hunah hian pawl 10 pass tharte'n Graduation March an nei a; Minister hian pass tharte hnenah certificate leh subject letter hmute hnenah thilpek a hlan nghal a ni.