Councillor-te'n bawlhhlawh paihna an tlawh

Lunglei Municipal Council (LMC)-a councillor-te chuan May 23, Thawhlehni khan Lunglei khawpui bawlhhlawh sawngbawlna hmun tur, Hauruang daia Solid Waste Management Centre (SWMC) siam mek tlawhin an enfiah.

LMC councillor-te hi chairman Lalzuithanga hoin an thawk chhuak a; Lalzuithanga chuan, Lunglei khawpui bawlhhlawhte awmze neia sawngbawl thuai a hmanhmawhthlaka an hriat avangin SWMC siam mek hi an enfiah tih a sawi.

Lalzuithanga chuan, Lunglei bawlhhlawhte chu ṭawih thei leh ṭawih thei lo thliar kalpui thuai ṭha an tih thu a sawi a; UDPA thuneitute pawhin SWMC chu Mizoram tan pawha entawn tlak ni se an duh avangin, a taka a puitlin hun an hmanhmawhpui hle thu a sawi rualin, SWMC siam mekah hna thawh tur zinga 20% vel chauh thawh a la nih thu a sawi bawk.