Hlawhtlinna sang zawk chang turin chanchinbu leh lehkhabu chhiar nasat a ngai - Ruatkima

Tuikual High School chuan nimin khan Tuikual South YMA Hall-ah kumin HSLC exam-a an zirlai pass tharte lawmpuina hun, ‘Graduation Day’ an hmang a, bialtu MLA Lalruatkima, minister-in a hmanpui. Minister chuan, hlawhtlinna sang zawk chang turin chanchinbu leh lehkhabu chhiar nasat a ngaih thu a sawi.

Lalruatkima chuan, zirna chu thiamna leh finna petu, mi ropui leh thiltitheia mihring siamtu a nih thu a sawi a, "Kan pi leh pute hunah khan zirna ngaipawimawh khua chu khaw nuam leh chhen­fakawm an ni ṭhin a, zirtirtute chu khawtlang ngaihsan leh ràwn berte an ni. Tunlaiah chuan nun­phungte a lo inher dang-lam ang zelin ngaihsan zawngte a inthlak nasa hle a, zirlaiten ngaihsan tur dik tak an ngaihsang thar leh a ṭul. Hlawhtlinna sang zawk chang turin chanchinbu leh lehkhabu chhiar nasat a ngai," a ti.

Kum 1952 aṭang khan India chuan ‘family planning’ kalpui ṭanin, Mizoramah pawh uar taka fa neih tlem inzirtirna kalpui a nih thu sawiin Minister chuan, "Mizoram dinhmun ngaihtuah erawh chuan fa neih tam a ngai hle thung. Khawvelah tam a pawimawhzia a takin hmuh mek a ni a, Mizote zingah fa neih tam a ngai a, chumi tur chuan nupui pasal pawh a hma lamah neih a ngai," a ti a, Mizoramah kum tina nau piang zat aṭanga chhût chuan rei loteah hnam anga ral a hlauhawm avangin fa neih tam lamah harh thar a ngaih thu a sawi.

Lalruatkima chuan social media-in Mizoram a rûn nasa tih a sawi a, zirlaite chu social media hman chintawk hre tur leh thawkrim a, uar leh nasa zawka an zirlaite zir tura fuihin, dinhmun sang zawk an thlen theih nan duhsakna a hlan nghal bawk.

Kumin HSLC exam-ah khan Tuikual High School zirlai 65 zinga 48 an pass a, tun dinhmunah zirlai 155 an nei mek a ni.