Minister-in zirlai pass tharte chawimawina a hmanpui

Bairabi Higher Secondary School Managing Board chuan nimin khan Bairabi North YMA Hall-ah HSSLC 2023-a an zirlai pass tharte chawimawina leh lawmpuina hun an buatsaih a, bialtu MLA K Lalrinliana, minister-in a hmanpui.

K Lalrinliana chuan zirlai pass tharte a lawmpui thu sawiin, "Beidawnna hi hlawhchhamna thlentu a nih angin exam beitute zinga hlawhtlinna chang ve lote pawhin beiseina lian zawk nei chungin nasa lehzualin ṭan la ang che u. Pass tharte pawh zirna-in sang zawk zawh tura in inbuatsaihna kawngah tum mumal tak nei ula, rilru siam fel hmasak a pawimawh," a ti a, thiamna hmantlak, khawtlang leh ram tana chhawrtlak neih a ṭul thu a sawi.

State ṭhenawma Zo hnahthlakten harsatna an tawh mek avangin Mizoramah raltlan ṭhahnem tak an awm thu sawiin K Lalrinliana chuan, "Unau inkara induhsakna leh inpumkhatna lantirna chuan hnam zahawm leh ropuiah min siam thei. Mizoram leilung hausakna haichhuah a nih theih nan mithiam mamawhna a sang a, chutiang mithiam chherchhuah a nih theih nan tuna zirtirtute leh zirlaite hi an pawimawh a ni," a ti.

HSSLC Examination 2023-ah khan Bairabi HSS zirlai 97% an pass a; Bialtu MLA hian zirlai pass tharte hnenah leh Bairabi HSS Managing Board leh Bairabi Higher Secondary School hnenah lawmpuina thilpek a hlan a ni.