KHAWTHLIR

Thisen pe

Synod Lay Workers Fellowship chuan an golden jubilee pualin nimin khan Synod Hospital tan thisen an pe. Jubilee pual hian May 10, leh 17-ah thisen an lo pe tawh bawk a, ni thum chhungin unit 71 an pe a, petute mipa 51 leh hmeichhia 20 an ni. Republic Higher Secondary School NSS unit pawhin May 23, Thawhlehni khan Civil Hospital Aizawl Blood Bank-ah kalin thisen unit 24 an pe a, petute mipa 17 leh hmeichhia pasarih an ni.

Science Congress

Samagra Shiksha, Khawzawl district leh Mizoram Science Teachers Association chuan nimin khan Khawzawl Vengthar YMA Hall-ah Sensitization Workshop on Children's Science Congress vawi 4-na an buatsaih a; Khawzawl district-a high school leh middle school-a headmaster leh science zirtirtu, an vaiin mi 103 an tel.

NH-06 kamah thingphun rêl

Champhai District Level Committee on Green Mizoram chu nimin khan an chairman James Lalrinchhana, bawrhsap hoin DC conference hall-ah an ṭhukhawm. Green Mizoram Day - June 10, 2023 pualin NH-06 kawngpui kamah thingphun hnatlang neih an rêl. Green Mizoram Award dawng thei tura tlingte hmalakpui dan tur an sawiho nghal.

Laptop pe

School Education minister Lalchhandama Ralte chuan nimin khan a bial chhung aṭanga kumin HSLC exam-a 4-na dinhmun luahtu Vanmalsawmsangi d/o Laithanpuia, Sawleng Donbosco School hnen­ah lawmpuina leh chawimawi nan laptop a pe.

Paperless report

Mizoram Forensic Science Laboratory (FSL) chuan June 1, 2023 aṭangin lehkha tel lo (paperless)-in forensic report an kalpui tawh dawn a, India rama kalpui hmasa ber leh awm chhun tur a ni. Home department tarlan danin, hetianga hma la tur leh a taka kalpui tur hian sorkar laipui chuan National e-Governance Plan hnuaiah Inter-Operable Criminal Justice System (ICIS) siamin, state sorkarte a nawr tawh ṭhin a; May 2022 aṭang khan Mizoram FSL chu hetianga kal tur hian a inpeih tawh a ni.