Kawng chhiat vanga Kolasib district-a tangkhang Lirthei táng enkawltute endiknaah Covid-19 vei mi 19 hmuh chhuah a ni

Hmawngkhawthlir leh Seṭhawn inkar hi Kolasib district magistrate Dr H Lal­thlang­­liana chuan August 6, Ningani khan luh leh chhuah phal lohna hmun, containment zone-ah a puang a ni. Containment zone-a Covid-19 vei hmuh chhuah chung­chang hi Kolasib DC Dr H Lalthlangliana nimin khan a pisaah thuthar thehdarhtute a hrilhfiah a; Kolasib leh Seṭhawn inkarah lirthei chi hrang hrang 572 an tangkhang mek tih sawiin, lirthei khalhtu leh puitu ṭhenkhat chu Covid-19 an vei leh vei loh endik a ni a, mi pathumin an vei tih hmuh chhuah a nih avangin emergency meeting an nei nghal tih a sawi.

Kolasib DC sawi danin, emergency meeting chuan, lirthei khalhtute leh puitute bakah, Se­ṭhawn vela cheng, hripui kai theia ngaihte endik rûnpui neih an rêl a; an rorel ang chuan Kolasib district medical team chuan RAT hmangin Ningani zan aṭanga nimin thleng khan swab sample lak leh endik hna an thawk a ni. Nimin zing dar 9 thlenga RAT hmanga swab sample endik zawng zawng chu mi 320 an ni a, an zinga 19 chuan hripui an vei tih hmuh chhuah a ni. Mi 19 zinga mi 18 chu truck driver leh handyman, hnam dang vek an ni a; pakhat erawh chu Mizo naupang kum 12 mi, Seṭhawn a chêng a ni.

Mi 19-te hi Thingdawla Covid-19 veite enkawlna hmun, Dedicated Covid Health Centre (DCHC), Polytechnic building-ah dah nghal an ni a, taksaa harsatna nei (Covid-19 symptom lang) an awm lo. Covid-19 vei hmuh chhuahte bakah hian, fimkhur thilah truck driver leh handyman-te bul hnaia khawsa hnam dang 13, Mizo mipa naupangte chhungkua leh an ṭhenawma in pahniha cheng mi 10 pawh Thingdawl DCHC-ah dah luh nghal an ni bawk.

Kolasib DC chuan, Aizawl lam pana kal tum khualzin leh sumdawngte chu Thingdawl paltlanga kal rih lo turin a chah a, "Loh theih loh vanga zin turte chu Serkhan-Bhaga road-ah emaw, Bairabi-Mamit-Aizawl kawng lamah kal tur a ni," a ti. Thuthar thehdarhtute zawhna chhángin Dr H Lalthlangliana chuan, Hmawngkhawthlir leh Seṭhawn inkar chu containment zone-ah puan a nih tawh avangin Kolasib district chhung hmun dangah curfew puan tumna a awm rih loh thu a sawi.

Tarlan tawh angin, Aizawl leh Kolasib inkar kawngpui chu tunlai hian hmun eng emaw zatah a chhiat nasat tawh avangin siamṭhat hna thawh mek a ni. Lirthei tangkhang an tam a, lirthei enkawltute avanga hri darh tur venna atan Kolasib DC chuan August 6 tlai aṭang khan lirthei tangkhang tamna hmun chu containment zone-ah a puang. Kawng chhiat vang leh containment zone puan avang hian lirthei tangkhang a tam hle a ni.