Mizorama Covid-19 vei Hmuh tawh zat mi 558

August 6, Ningani leh nimin khan Mizoramah Covid-19 hripui vei mi 21 hmuh chhuah belh a ni a, hripui kai hmuh tawh zawng zawng chu mi 558 an ni.

Zoram Medical College (ZMC) laboratory-a mi 246 (mipa 112 leh hmeichhia 134)-te swab sample endik zingah Covid-19 vei pahnih, Aizawl district mi, Assam aṭanga haw ve ve hmuh chhuah a ni a; mipa kum 36 leh hmeichhia kum 59 mi an ni. Quarantine facility-a awm lai an ni a, taksaah harsatna an nei lo.

Ningani zan leh nimin zing khan Seṭhawn leh a chhehvela tangkhang truck driver leh handyman-te Rapid Antigen Test hmanga endikah Covid-19 vei mi 19 hmuh chhuah an ni bawk. Truck tangkhangte driver leh handyman-te chu endik chhunzawm zel a ni.

Mizoramah Covid-19 kai hmuh chhuah tawh mi 558 zinga mi 288 (51.61%) chu chhuahtir an ni tawh a, mi 270 (48.39%) an la chhuak lo. La chhuahtir loh zingah hripui vei tawh lo tih finfiah eng emaw zat an awm tawh bawk.