Zo hnahthlak raltlante dawnsawn kawnga Mizo mipui ṭanrualna MNF-in lawmawm ti; ‘Manipur-ah CM thlawh chhoh a tum hman’ - MNF Media

MNF Media & Publicity dept. chuan nimin khan Aizawl Press Club-ah thuthar thehdarhtute kawmin, Myanmar, Bangladesh leh Manipur buaina avanga Zo hnahthlak rawn raltlante dawnsawn an nih dan chu lawmawm an tih thu sawiin, "Manipur-ah Chief Minister thlawh chhoh a tum hman," an ti.

MNF Media general secretary VL Krosshnehzova chuan, tunhnaiah Myanmar, Bangladesh leh Manipur-a Zofate chuan harsatna hrang hrang an tawk tih a sawi a, "Mahni in leh lo chhuahsanin an sahimna zawngin Zofate Jerusalem, Mizoramah an rawn raltlan a ni," a ti a, Mizorama Mizote'n Zo hnahthlak raltlante an lo dawnsawn a, an lo enkawl dan an hmuhin MNF chuan thinlung taka lawmawm an tih thu a sawi.

Sorkarin raltlante dawng-sawnga a tuamhlawm dan te, YMA, MZP, tlawmngai pawl, kohhran leh political party zawng zawngin an theihna zawn ṭheuhah theihtawp chhuahin an lo buaipui tih sawiin VL Krosshnehzova chuan, "Mizoram state-in hmun danga kan unaute tana theihtawp a chhuah hi MNF chuan ropui a ti tak zet. Nationalism-in hma a sawn zel avangin MNF party a lawm tak zet a ni," a ti.

VL Krosshnehzova sawi danin, kum 2022 tir lam aṭangin Mizoramah Myanmar aṭangin Zo hnahthlakte an rawn raltlan a, India sorkar chuan thawn let leh turin Mizoram sorkar hnenah instruction a rawn pe. Chief Minister chuan 'kan unaute an ni a, hetiang dinhmuna an awm laia an nunna humhim tura rawn tlanlutte hi kan hnawt kir thei lo. A theih ang angin kan lo tuamhlawm dawn' tiin theihtawp chhuahin sorkar leh mipuiin an lo tuamhlawm.

Bangladesh lama Zo hnahthlakte’n nikum November vel aṭang khan harsatna an tawk ṭan a, an rama an him tak loh avangin Mizorama lo luh an tum khan India ramri vengtu sipaite’n nasa takin an lo dang a ni. Heti chung hian Mizorama Zo hnahthlakte an lo luh theihna tur kawng hi zawn a ni a, Chief Minister hmalaknain India sipaite an khawng viau chungin Mizorama raltlan turin an lo lut tlang thei a ni.

MNF Media chuan May, 2023 aṭangin Manipur buaina a inṭan ve leh tih sawiin, "Mizoram mi tangkhangte lakchhuah kawnga Mizoram sorkar hmalakna kha chhuanawm kan ti tak zet a, sum leh pai eng emaw zat sen ral a ni nghe nghe. Manipur-a Zofa chi peng hrang hrang buaina tawkte Mizoram sorkar-in a buaipuina pawh lawmawm kan ti tak zet a ni. Mizoram sorkar chuan Manipura kan unaute tan liau liau special-in buhfai qtl. 1,840 a thawn tawh bakah hian Manipur aṭanga raltlan Mizorama awmte ei turin qtl. 2,156 a sem tawh," an ti.

Manipur-a Mizoram mi tangkhangte thiarchhuah hna Mizoram sorkarin theihtawp chhuahin a thawk a, chief minister Zoramthanga pawh Manipura thlawh chhoh tumin a inbuatsaih hman hial tih sawiin MNF Media chuan, "Venhimna lama a remchan loh avang leh Manipur lamin an lo welcome loh avangin a thlawk chho ta lo a ni," an ti a, Mizoramin pá chan zo taka changtu Chief Minister a neih avanga an lawmthu an sawi.

MNF Media chuan Mizoram sorkarin Zo hnahthlak raltlan naupang sikul kal rualte lehkha a zirtir tih sawiin, "HSLC leh HSSLC-te pawh ṭha takin an pass a, distinction hial pawh an awm. Hei bakah hian nimin mai khan sorkar chuan hriattirna siamin, sorkar sikulah refugee-te luh tir turin zirna lama thuneitute a hriattir. India sorkarin raltlan thawn kir tur a tih laiin nationalist sorkar chuan a tuamhlawm mai ni loin, lehkha a zirtir hial zawk," an ti.