Health care scheme-ah bill la pek loh cheng nuai 7,477 chuang a la awm

Mizoram State Health Care Scheme (MSHCS) hnuaia damlo bill chu November 2021 thlenga thehlut chinte pek zawh an la ni lo a; May 24, 2023 thleng khan MSHCS hnuaiah hian damlo bill bá cheng nuai 7,477 chuang a la awm.

Vanglaini thu dawn danin, MSHCS hnuaia bill lutte chu sorkar aṭanga sum an hmuh veleh pek chhuah turin an buaipui nghal zel a, May 6, 2023 kha sorkar aṭanga pawisa an hmuh an pek chhuah hnuhnung ber a ni.

MSHCS hnuaia bill la pek lohte hi kum 2021-2022 a inziak lut zinga mi 10,473-te inenkawlna senso Rs 27,82,42,902 leh kum 2022-2023 inkara mi 15,063-te inenkawlna senso Rs 46,94,62,612 a ni.

Kum 2021-2023 inkara bill la pek loh zawng zawng hi mi 25,536-te inenkawlna senso Rs 74,77,05,514 a ni a; kum 2023-2024 ah pawh hian bill lut a awm nual tawh a ni.

Hetihlai hian, Mizoram sorkar chuan MSHCS atan hian Asian Development Bank (ADB) aṭangin cheng vbc 1,000 pûk a tum a, hei hi tihfel theih a nih chuan bill tâng tam lutuk ṭhin chuan ziaawm lam a pan theih MSHCS-a thawktute chuan an beisei.

Sorkar laipuiin a remtih hnuah ADB leh Mizoram sorkar chu loan chungchangah hian ṭum eng emaw zat an indawr tawh a, loan tihfel hun tur erawh hriat theih a la ni lo.

Tun hnai khan ADB hotute chu Mizoramah rawn zinin, Health minister Dr R Lalthangliana chu a pisa-ah an kawm a; Dr R Lalthangliana chuan loan process-te tirang a, chak taka hma la turin ADB hotute hi a lo ngen a ni.