CADC CEM atan Rasik Mohan Chakma

Lawngtlai addl. DC Abraham Beirazi Khithie chuan nimin khan Art & Culture hall, Lawngtlaiah Borapansury MDC constituency aṭanga thlan tlin Rasik Mohan Chakma (MNF) chu Chakma Autonomous District Council (CADC) sorkar 11-na chief executive member (CEM) atan rinawmna thu tiamtirin a la lut.

Rasik Mohan Chakma chuan CADC-ah rintlak leh langtlang sorkar kalpui a nih theih nan hma lak a tum thu a sawi a, "CADC sorkar ngelnghet tak a awm theih nan te, mi harsa zawkte dawm kan kawngah te, zirna ṭha a awm theih nante theihtawp kan chhuah dawn," a ti.

CADC CEM atan lak luh thar Rasik Mohan Chakma hian nimin khan CEM pisa a luah lut nghal a ni.

CADC CEM thar Rasik Mohan Chakma hi CADC-ah MDC atana term 6 thlan tlin a nihna a ni a, CEM nihna hi ṭum 5 a chelh tawh. Kum 2003 MLA inthlanpuiah khan Tuichawng bial aṭangin MLA atan thlan a lo ni tawh bawk.

CADC inthlanpui, 2023 neih zawh takah khan MDC bial 20 zingah Mizo National Front (MNF) party chuan seat 10 lain, party dang aṭangin MDC panga in an zawm leh a, MNF party hian MDC 15 an nei ta a ni.