Mizoram tribe list siamṭha tura ngenna PC-in Home Minister hnenah an thlen

Peoples Conference party chuan nimin khan Mizoram tribe list siamṭha tura ngenna Home minister Lalchamliana hnenah an thlen.

Mizoram tribe list siamṭha tura ngenna lehkha hi PC senior vice president Lalrinzuala Chawngthu-in Home Minister hnenah a hlan a ni.

PC party chuan, Indian Constitution (Scheduled Tribes) Order, 1950 hnuaia Mizoram tribe list-ah Mizo hnam peng - Kuki, Hmar, Pawi, Paite, Lakher, Mizo (Lushai)-te chuangin, chu'ngte chu tribe hrang hlak anga ngaih theih a nih thu an tarlang a, "Hei hian Zo fa hnam hrang hrang inunauna leh insuihkhawmna kawngah harsatna a thlen thei nia kan hriat avangin Sl. No. 10 'Any Mizo (Lushai) tribes' tih hi India dan hnuaiah Mizo leh Zofa hnam dangte tribe hrang hlak anga kal thei a nih avangin 'Any Lusei tribes' tiin emaw siam ṭhat kan duh. Zo fa hnam lian list-a chuang lo Ralte, adt. te pawh dah luh ni se kan duh bawk," an ti.

Scheduled Tribes Order, 1950 hnuaiah Kuki hnam tih loh Zo fa hnam dang chi peng (sub-clan) tarlan loh chi peng hlawm lian chin tarlan ṭha an tih thu leh Mizorama India khua leh tui dik tak awmte pawh an chi peng tarlan ni se an duh thu an tarlang.

The Mizoram Scheduled Tribes and Scheduled Castes (Regulation of Issuance and Verification of) Community Certificate Act, 2014 hmangin sorkar hnuaia zirna-in hrang hrangah seat hauh te, scholarship, grant, allowance dawn te, degree/diploma nei te, co-operative society leh tualchhung sorkar inthlana ding leh tlingte tribe/caste list chungchangah hmalak thuai ṭha an tih thute an tarlang bawk.

PC chuan, MLA inthlanpuiah schedule tribe tan chauha chuh theih bial awm ṭhin chu fet taka teh ni se an duh thu an sawi a, "India khua leh tui dik tak Mizorama awm nghet, Zo fa ni lo hnam dangte'n an dikna chanvo an chan theih nan an dinhmun zir chian ni se," an ti.