Zirlaite ṭhanlen zelna turah zirtirtute an pawimawh - Dy. Chief Minister

Govt. Zemabawk Primary School-I chuan nimin khan Zemabawk North Tlang Veng Judo Hall-ah an sikul kum 100 (centenary) tlin lawmna an buatsaih a, deputy chief minister Tawnluia'n hmanpui a, zirlaite ṭhanlen zelna turah zirtirtute an pawimawh thu a sawi.

Tawnluia chuan, Govt. Zemabawk Primary School-I in kum 100 a tling thei chu ropui a tih thu a sawi a, "Sikul din tirh aṭanga bulṭantu, sulsutute an fakawm a, an thawhrim rah chu sikul leh khawtlangin an seng mek, "a ti a; sikul changtlung tak, zirlai naupang tam tak tana zirna-in ṭha leh mihring puitlinga chherchhuaktu a nih theih nan khawtlang hruaitute ṭawiawmna a ngen nghal.

Primary school chu mihring nun chherchhuahnaa bultumtu ber, a bulṭhut leh a lungphum a nih thu sawiin Tawnluia chuan, "Bulṭan ṭhat chu zo tluk a nih angin, zirlaite ṭhanlen zelna turah zirtirtute an pawimawh hle a, an mawhphurhna sang tak chu hriaa dawhthei taka naupangte kawng kawhhmuhtu leh tuamhlawmtu an nih zel a pawimawh," a ti.

Dy. Chief Minister hian centenrary puala buatsaih souvenir a tlangzarh nghal a, centeneray lawmpuina atan sikul thuneitute hnenah Rs 20,000 a hlan bawk.

Centenary lawmna inkhawmah hian AMC Ward-VII councillor Vanlalneia pawhin thu a sawi a; sikul din tirh aṭanga zirtirtu lo thawk tawhte hnenah chawimawina hlan a ni.

Govt. Zemabawk Primary School-I hi a tirah chuan Zemabawk Primary School tih a ni a, kum 1969-a Primary School-II a lo din khan Govt. Zemabawk Primary School-I tia thlak a ni. A din tirh aṭangin zirtirtu (officiating tel loin) 54 an thawk tawh a, zirlai naupang 168 an awm mek a ni.