Sikserh hluarna hmun enfiah

Health Services joint director (Malaria) Dr Lalremmawii leh Health department official dangte chuan August 6, Ningani khan sikserh natna hluar zualna hmun, Tlabung chhehvela khuate a tlawh a, sikserh vei an pun zel lohna tura hmalaknate a enfiah.

Kumin 2020 chhungin, January aṭanga June thla thleng khan Mizoramah sikserh vei mi 3,720 hmuh chhuah a ni tawh a, chu'ng zinga mi 1,144 (30.75%) chu Lunglei district-a mi niin, Lunglei district-ah pawh khawthlang lamah an tam zual a ni.

Health department official-te hian Tlabung bakah, a chhehvel khuaa khawtlang hruaitute an kâwm a; sikserh natna a darh zel tur vên kawnga thawhpuiah sáwmin, sorkarin sikserh doa hma a lakna hrang hrangah ṭha taka mipuiin an ṭawiawm theih nan ṭan lâkpui turin khawtlang hruaitute chu an ngen.

Dr Lalremmawii chuan, tun hnaia Tlabung ṭhenawma khaw pahniha chengte thisen an endiknaah sikserh vei mi 100 chuang ve ve hmuh chhuah a ni tih sawiin, "Mizoram hmun dangah hetianga tam hi ni khat thil thuah sikserh vei hmuh chhuah a la ni ngai lo. Tlabung leh a chhehvel hi sikserh donaah nasa lehzuala ṭan lak a ngaihna hmun a ni," a ti a; sikserh veite enkawlna tur damdawi an sem chu a ṭhat tâwh thu leh a bikima ei tluan lo an awm ṭhin chu pawi a tih thu a sawi.