DC-in CQC siam leh turin a ngen

Aizawl Bawrhsap chuan khua leh veng hrang hranga task force-te chu community quarantine centre (CQC) siam leh turin August 6, Ningani khan a ngen.

Village/local task force-te hnena Aizawl DC-in August 6, 2020-a lehkha a thawnah, Covid-19 hripui chu Mizoramah vei an pun zel thu leh community spread (mipui vangtlanga darh) palha inrálrin a ṭul thu a ziak a, "Chutih rualin, ei leh bara kan harsat lutuk loh nan inkhàrkhip reng theih a ni si lo a, airport leh ramri luh chhuahnate pawh hawn a lo ni ta zel a. Hei vang hian ni tin khualzin za têl Mizoramah an rawn lut reng a ni," a ti.

State páwn aṭanga rawn lutte leh Covid-19 positive contact tracing vanga khung hran ngai veng tinah an la pung dawn nia sawiin Aizawl DC chuan, "Hei vang hian khua/veng tinte'n mahni khua leh tui, mahni veng mi leh sate chauh tal chu lo mikhual thei zel turin CQC nei ṭheuh turin village/local task force zawng zawng kan inngen nawn leh a ni," a ti a; CQC chu hman a ṭul hun tur sawi lâwk theih ni lo mah se, hman a ṭul veleha hman a nih theih nan inring turin a ngen a ni.