CYMA-in dawr 26 hawn an phalsak leh; 'Kan enzui zel dawn' - CYMA President

Central YMA-in hnam­dang, Mizo hming hawha dawr nei, cement leh iron rod zuar, an dawr a kharsak 67 zinga dawr 26-te chu hawn a phalsak leh tawh.

Vanglaini palai zawhna chhangin CYMA president R Lalngheta chuan dawr an kharsakte hi uluk taka vilzui an nih thu sawiin, "Heng dawr hawn kan phalsakte hi Mizo ngeiin an enkawl tawh dawn tih hriatchian a, dawr awmna branch YMA-te pawhin an hriatpuite vek an ni. Pawisa an inchinfelnate pawh ensak an ni a, rinngam tawkah kan ngai," a ti.

CYMA President chuan dawr hawn an phalsak tâkte pawh chu an enzui reng dawn tih sawiin, "A bik takin dawr awmna branch YMA-te kutah a awm deuh a, CYMA lam pawhin a theih ang angin a vil reng ang. Hnam­­dangin dawr an kalpui leh nia kan hriat chuan khar turin hmalak leh a ni dawn," a ti a, an tum dan hi dawr neitute pawh kohkhawma hrilh an nih thu a sawi.

R Lalngheta sawi danin, dawr hawn an la phalsak loh 41 zingah pawh dawr hawn a nih theihna atana CYMA-in ṭul a tih angte tifel tura hma la mek an awm. An inchingfel nia an sawi hunah zirchian a ni ang a, an lo inchingfel ngei a nih chuan an dawrte hawn remtihsak an ni ang.

CYMA chuan May 24, Ningani khan thuchhuah siamin, "CYMA-in Mizo hming hawha cement leh iron rod zuartute dawr a khar sak 67-te uluk taka a zirchian hnuah, dawr 26-te chu hun tiam kan pek chhunga an inchinfel avangin an dawr hawn phal sak an ni. Heng dawrte hi an awmna branch hruaitu te lo enzui tura ngen an ni. Dawr hawn la phalsak rih loh 41 chu la zirchian leh tura dah a ni," an ti.