Mizoram inthlanpui hma ngeiin Roll aṭanga Bru paih turin ngen

Tripura-a awm Bru, Mizoram Electoral Roll-a awmte paih hna chak taka kalpui turin Central YMA chuan nimin khan Election Commission of India (ECI) hnenah an ngen.

CYMA hruaitute chuan nimin khan Chief Election Commissioner (CEC) hnenah lehkha an thawn a; Mizoram aṭanga mahni duhthua Tripura-a pem Bru-te chu Mizoram Electoral Roll aṭanga paih hna kalpui mek chak taka kalpui tur leh, kumin kum tawp lama Mizoram inthlanpui hma ngeia paih kim turin an ngen a ni.

Ngenna lehkha hi CYMA hruaitute chuan ECI hotu Aizawla châm mekte hnenah an pe a; deputy election commissioner Dharmendra Sharma chuan lehkha chu CEC a pek tur thu a sawi.

Central YMA hian an lehkhathawn copy chu Union Home Secretary leh Mizoram Chief Secretary hnenah an pe tel bawk.