Cabinet-in lirthei khuahkhirh a rêl

Nimina chief minister Zoramthanga hoa CMO cabinet room-a Council of Minister ṭhukhawm chuan, Mizoram páwn aṭanga mipui ni tin mamawh ni lo, bungraw dang phur lirthei rawn lut turte khuahkhirh an rêl.

Cabinet meeting chuan, Covid-19 léng laka mipui an him theih nan, state páwn aṭanga Vairengte leh Kanhmun paltlanga bungraw phur lirthei zingah, thu leh awm hma chuan mipui ni tin mamawh (essential commodity) phur chauh kaltlang phal rih ni se, an ti a; bungraw dang lirtheite erawh chu Mizoramah luh phal a ni tawh dawn rih lo.

Kolasib district chhunga national highway-a truck eng emaw zat tangkhang mek zinga driver leh handyman-te Rapid Antigen Test (RAT) hmanga an enfiahnaah Covid-19 vei mi 19 hmuh chhuah tawh a nih avangin, mipui him zawkna turin he thutlukna hi siam a ni.

Cabinet meeting-in a rèl dan chuan, essential commodity phur lirthei khalhtu leh handyman-te chu ramria entry point-ah uluk taka endik vek tur a ni a, Rapid Antigen Test-a negative finfiahte chauh Mizorama an luh tlang phal an ni ang. Khaw chhunga an riah phal a ni lo. 

Lirtheiin an bungraw dahna hmun an thlen hnuah pawh sorkarin kaih­hruaina a siam ding lai angin páwna chhuak­ loin, bungraw hláng­thlatute nen pawh physical contact awm lo turin inhlat takin an awm ang a, bungraw hlànthlak zawh veleh lêt leh nghal tur a ni.

Sorkarin kaihhruaina a siam ṭha taka an zawm ngei theih nan kawng lakah police patrolling tam zawka kalpui tum a ni a; bungraw phur lirtheite tan Vairengte leh Kanhmun kawng chauh hawn a ni dawn a, Bairabi leh Saiphai lam kawnga ramri chu khâr rih a ni ang.

Kolasib district din­hmun thlithlai a, dis­trict administration hmalak­na enpui turin vawiin hian­ minister pathum - Lal­chhan­dama Ralte, Lal­ruat­kima leh TJ Lalnun­tluanga te an kal dawn a ni.