Commerce and Industries minister Dr R Lalthangliana chuan, Tuipui-D khuaa Chhimtuipui luiah cheng nuai 9,200 sengin lei (bridge) lian dawh a nih dawn thu leh cheng nuai sing chuan man pawh a la nih theih dawn thu a sawi.
Dr R Lalthangliana hian nimin khan South Vanlaiphai Tourist Lodge-a political session-ah thu sawiin, Chhimtuipui Darzo kaiah lei lian cheng nuai 9,200 senga an dawh tur chu cheng nuai sing chuang pawh a la ni theih tur thu a sawi; lei dawh tur chu nasa taka a nawr hnua hlawhtling a nih thu a sawi a ni.
Darzokaia lei dawh tur chu MNF sorkar hnuaia hmasawnna ruhrel lian tak a nih thu sawiin R Lalthangliana chuan, "Lei dawh turah hian a bul vela mite tana compensation pek tur cheng nuai 700 zet DC office-ah a awm tawh. Delhi ka kal apiangin BRO hotute leh Finance ministry lamte nasa takin ka nawr ziah a, China ral lo lian ta se, a ṭangkai dan tur ka sawi chu Central pawhin an ngaih pawimawh phah hle. Thla lehah emaw chuan Chief Minister emaw, Central minister-in emaw a lung an rawn phum ang tih ka puang a ni," a ti.
Dr R Lalthangliana chuan, Darzokaia lei dawh tur chu Chhimtuipui Kawlchaw lei aia sei zawk tur a nih thu sawiin, "Truck lian ke 14 nei pawh a insulpel zur zur thei dawn. Tender pawh chhuah tawhin, June thla hi chuan a thawktu tur contractor hming kan hriat hman ka beisei," a ti a; lei chu tui a len lai ber pawha a chîm phak ngai loh tur a nih thu a sawi.
Minister chuan, kumina MLA General Election-ah Zoramthanga kaihhruai sorkar hi a piang nawn leh ngei dawn nia sawiin, "Zoram mipui tan nasa takin kan thawk tak tak thei tawh dawn a ni," a ti bawk.