24th Annual Convention of Tourist Guide Federation of India
Mizoram Tourism department leh Tourist Guide Federation of India (TGFI) chuan nimin khan Dawrpui Multipurpose Hall-ah India rama tourist guide-te intawhkhawmna, 24th Annual Convention of Tourist Guide Federation of India an buatsaih a, Tourism minister Robert Romawia Royte chu khuallian niin, ministry of Tourism director general Manisha Saxena chu khualzahawm a ni.
Robert Romawia Royte chuan, TGFI inkhawmpui kaltlang hian zinmiten Mizoram an hriat phah ngei a beisei thu a sawi a, "Mizoram hi ram mawi tak, tourist-te tana kal manhla tak a ni a, Mizoram sorkar chuan Mizorama tourism hmasawn nan nasa takin hma ala a, national leh international market ni turin hna a thawk mek," a ti.
Mizoram sorkar Tourism dept. hnuaiah tourist guide mi 89 an awm mek thu sawiin Minister chuan, "Tourist guide-te hian thil nihna a let 10 vela hluin khualzinte hmaah an lantir thei tih keimah ngeiin ka tawng tawh a, tourist guide ṭha chuan dam chhunga hriatreng tur khualzinteah a hnutchhiah sak a, rawn kal leh chakin an siam ṭhin," a ti a; Mizo tourist guide-te chu TGFI-a an inziahluh ve theih nan TGFI hruaitute chu hmalakpui turin a sawm nghal bawk.
Manisha Saxena-i chuan tourist guide-te chu khualzinte lo dawngsawng hmasa tu an nih thu sawiin, "Khualzinte mit leh beng an nih avangin an pawimawh hle. Tourist guide-te hian khualzinte inhruai a ni ringawt lo a, in kalpuina hmuna awmte tan economy hmasawnna in siam thei," a ti.
He hunah hian TGFI president Narendra Singh Rathore, co-ordinator Ajay Singh bakah, Mizoram Tourism joint secretary V Lalengmawiaten thu an sawi a; India ram hmun hrang hrang aṭangin tourist guide 132 an tel. Vawiin hian Tourist guide-te hian Reiek tlang an tlawh ang a, naktukah Mizoram chhuahsanin an haw ang.
TGFI hi kum 1996-ah din a ni a, tourism leh a kaihhnawih sector-a sorkar laipui puibawm tur leh India rama tourist guide-te hmasawnna ngaihtuah tura din niin, tunah hian member 3,400 vel an nei mek a ni.