Hmar khawthim tih ènin a awm mek - Lalchhandama Ralte

Tuivawl bialtu MLA Lalchhandama Ralte, minister chuan nimin khan a bial chhunga Mauchar khuaah VC House thar a hawng a; "Hmar khawthim zangkhaw bungbut hnan tih ṭhin chu tih ènin a awm mek," a ti.

Lalchhandama Ralte chuan hripuiin hnathawk thei loa kum hnih chhung khawvel a chawh buai thu a sawi a, "Sorkar sum leh pai a tla chhia a, heti chung hian hmar khawthim zangkhaw bungbut hnan tih èn mek a ni. Hmar thimpui tih ènna tur hian kawngpui thar sial leh a awm sa siamṭhat hna te, tui harsa khuate tan tuilak hnate thawh a ni a, zirna lamah pawh zirtirtu dah belh leh building sak thar hnate thawh a ni," a ti a, zirlaite an pung zel niin a sawi.

Hriselna lamah thawktu dah belha thuamṭhat ngaite thuamṭhat a nih thu sawiin Tuivawl Bialtu MLA chuan, "Manipur nena inkalpawhna leh Bhaga nena inkal pawhna kawngpuite chu zawhfel a nih hunah chuan hmar khawthim, Zoram khaw tawp kha kawtchhuah thar a ni dawn a, he tlangdung hian awmze neiin hma a sawn mek a ni," a ti bawk.