KHAWTHLIR

KṬP, Electric Veng Branch, Aizawl chuan nimin khan thisen pek rûnpui an huaihawt a, mipa 67 leh hmei­chhia 10-te'n Aizawl Civil Hospital tan thisen unit 77 an pe. Chhipphir Bial PYD (NEI) pawhin Sekhum UPC Kohhran Hall-ah thisen pek huaihawtin, Chhipphir, Mualṭhuam North, Kànghmun, Bualpui leh Sekhum khua aṭangin mipa 48 leh hmeichhia 16-te'n Lunglei Civil Hospital tan thisen unit 64 an pe. Champhai Hospital Veng Branch KTP chuan Champhai District Hospital tan thisen unit 15 an pe a, petute mipa 10 leh hmeichhia panga an ni.

Lai Autonomous District Council (LADC)-a executive member (EM) ni lai Lallawmsanga Apetow chuan June 26, 2019 khan EM aṭanga bànna a thehlut a, a hmun ruak luahkhat turin nimin khan Bualpui (NG) East bialtu MDC K Vanlalsanga chu EM atan lak luh a ni. Lak luhna inkhawm hi Lawngtlai DC conference hall-ah buatsaih a ni a, bawrhsap Dr Andrew H Vanlaldika'n rinawmna thu tiamtirin a la lut a ni.

Zoram Medical College Faculty Doctors’ Association (ZFDA) chuan an hlawh aṭangin 10% an thawh khawm Rs. 5,59,180 chu ZMC din champha vawi hnihna pualin nimin khan Chief Minister’s Relief Fund-ah an pe.

The Grand Hotel-a thawk mi pahnihin Covid-19 an vei vanga an kài chhàwn theiha ngaih, MyHamz dawr leh dawr danga a neitute leh thawktu mi 12-te swab sample, ZMC laboratory-a August 6, Ningania endik result chu a chhuak tawh a, hripui vei an awm lo tih hmuh a ni. Ningani veka Lunglei Civil Hospital laboratory-a swab sample 16 endikte leh Rapid Antigen Test hmanga endik mi 145-te'n Covid-19 an vei lo vek bawk.

Siahaa Joint NGO (MTP, MChP, MSO) leh DC pisaa thawkte chuan nimin khan Siaha DC aṭanga chhuak tur Bhu­pesh Chaudhary, IAS chu Circuit Hall-ah an thlah. Bhupesh Chaudhary chuan, amah thlahna hun buatsaih a ni chu lawm­awm a tih thu sawiin, "Siahaa ka awm chhung­in Maraland mipui, tlawm­­ngai pawlte leh kohhrante'n min duhsakna leh hma­ngaihna hi ka theihnghilh tawh lo ang," a ti.

Zoram Peoples' Movement (ZPM) party chuan, August 27, 2020-a village council leh local council inthlan awm turah, an party candidate-te chu symbol (chhinchhiahna) aṭan 'Khumbeu' hmang ṭheuh turin an chah.Nimina ZPM Circular chuan, "Local Council Rules, 2015 Section 46(6)-in a sawi angin, registered party, recognised party ni si lote tan free symbol pek aṭangin eng symbol pawh hman phalsak a ni a. ZPM Ge­neral Headquarters chuan LC leh VC inthlanah ZPM hminga kan official candidate turte zawng zawngin symbol atan khumbeu hman ṭheuh tur a ni," a ti.

State Referral Hospital-ah nimin khan Covid-19 vei pakhat dah luh a ni a, ani nen hian SRH-ah hripui vei mi 41 enkawl mek an ni. SRH-ZMC Bulletin tarlan danin, nimin khan ICU aṭangin pakhat chu Isolation Ward-ah sawn a ni a; ICU leh SICU-ah pahnih ve ve awmin, Isolation Ward-ah 37 an awm. ICU-a awm pakhatin ventilator a la hmang zel a, Isolation Ward-a awm zinga pathumin khawsik sáng vak lo nei a ni.

Lunglei DC chuan Lunglei district-a Covid Care Centre (CCC) atana hman, Zobawk damdawi-in (Primary Health Centre) chu Covid-19 veite enkawl nan hman ṭan a nih tawh avangin, damdawi-in leh a chhehvel chu luh leh chhuah phal lohna hmun, containment zone-ah nimin khan a puang. Damdawi-in compound chhung­ah DC-in phalna a pek te, medical duty te, security duty-te leh thawktute bak luh leh chhuah phal a ni lo.