Mizoram hmasawnna atan hmasawnna ruhrel lian tak tak din ngaih pawimawh a ni - Chief Minister

NITI Aayog Governing Council chu an chairman Narendra Modi, prime minister kaihhruaiin May 27, Inrinni khan New Delhi-a New Convention Centre-ah an ṭhukhawm a; chief minister Zoramthanga pawh telin, Mizoram hmasawnna atan hmasawnna ruhrel lian tak tak din ngaih pawimawh a nih thu a sawi.

Chief Minister chuan Sustainable Development Goals (SDG) Index 3.0 ranking hnuhnung berah state hma la ṭha 15 zingah Mizoram chu 12-na a nih thu a sawi a, "Mipui hmaṭhatna turin leh a bik takin mahni kutkawiha eizawngte puia tihhmasawn nan state flagship programme SEDP kalpui mek a ni a, an eizawnna chàwisân a nih a, an sum lakluh a lo tam zawk nan trade 52-ah incentive pek a ni," a ti.

State pum hmasawnna atan hmasawnna ruhrel lian tak tak din ngaih pawimawh a nih thu sawiin Chief Minister chuan, "Hemiah hian inkalpawhna lama hmasawnna - rel kawngte, national highway leh adangte chuan sumdawnna leh a kaihhnawih dangah hmasawnna a thlen tel zel dawn. Hmasawnna ruhrel daihrei tur dinna atana sorkar laipuiin Special Assistance to States for Capital Investment (SASCI) a duang hi a lawmawm hle," a ti a; state-te'n ṭangkai zawka an hman leh theih nan he scheme hnuaia inkaihhruaina ṭhenkhat chu a aia khirh lo zawka siamṭhat ni se a duh thu a sawi.

Sorkar laipui scheme ṭhenkhat hnuaiah land acquisition atana a hranpa sum dah a nih loh avanga harsatna awm ṭhin chu sutkian ni se a duh thu pawh Chief Minister chuan meeting-ah hian a thlen.

CM Zoramthanga chuan, sorkar hma­lakna leh bultum ngawr ngawr chuan hma­sawnna hna zawng zawng a thawh theih vek loh avangin private investment uar tura hmalak zel a nih thu a sawi a; Mizoram chu Ministry of DoNER-in North East Global Investors' Summit a kalpui mekah pawh phur takin hma a lakpui thu sawiin, "Mizoramah healthcare infrastructure-in duhthu la sam tawk lo mah se, naupang 100% hnenah rotavirus hri danna pek a ni a, ram chhunga Infant Mortality Rate hniam ber kan ni," a ti.

Lawngtlai, Siaha, Serchhip leh Mamit District Hospital-te tihchangtluna thuamṭhat mamawh a nih dan te, Community Health Centre-te chu First Referral Unit ni tura tihchak a pawimawhna te, hmeichhiate dinhmun chawikan kawnga Mizoramin nasa taka hma a sawn dan te, district tinah Working Women Hostel sakna tur sum pek mamawhna te, sumdawng hmeichhiate'n an hman ṭangkai tur nau enkawlna (creche) siam a ṭul thu leh Mizoramin raltlante a dawnsawn dante Chief Minister chuan a sawi bawk.

Chief Minister hi chief secretary Dr Renu Sharma-i'n a ṭawiawm. Kumin Governing Council meeting thupui chu 'Viksit Bharat @2047: Role of Team India' tih a ni.