KHAWTHLIR

Power & Electricity Work Review Meeting

Power & Electricity dept chuan May 27, Inrinni khan Secretariat conference hall-ah 'Work Review Meeting' an buatsaih a, Ministry of Power secretary Alok Kumar-a'n telpuiin; India sorkarin mipui hnena êng chhit man tlawm, mi tin thleng zo leh boruak tibawlhhlawh lo thlen chu a tum ber pakhat a nih thu a sawi a, "Sorkar laipui chuan thil pahnih ngaih pawimawh zual a nei a - thingtlang kilkhawr thleng phak power quality ṭha pek leh êng chhitin a behbawm zawng zawng chu mipuite tana phurrit lutuk ni loa a pe chhuaktuin chawm zo tho si pek a ni," a ti.

Pass tharte lawmpui

Zokhawthar khua chuan May 27, Inrinni khan Zokhawthar YMA Hall-ah kum 2022-2023 academic session-a HSLC leh HSSLC pass tharte lawmpuina hun an buatsaih a; minister of state TJ Lalnuntluanga, bialtu MLA-in a hmanpuiin, HSLC pass thar mi 36 leh HSSLC pass thar mi 27, an vaiin zirlai 63 hnenah lawmpuina thuziak leh dictionary a hlan a ni.

Pipe phum dawn

SIPMIU-in vawiin aṭanga Vaivakawn Hunthar peng leh Chanmari West inkar kawngpuiah pipe phum hna an thawh dawn avangin Aizawl Traffic SP chuan lirthei tlan dan tur a tidanglam a, thupek hian hnathawh zawh hma chu a huam ang. Traffic SP tarlan danin, helai hmunah hian ni tin zing dar 5 aṭanga zan dar 8 inkarah kawng chanve khar a ni dawn a, zan dar 8 aṭanga zing dar 5 inkarah kawng hi a puma khar a ni ang. Kawng chanve khar a nih chhung hian Chanmari aṭanga Vaivakawn kal turte chauh tlan phal a ni a; hnathawh tibuai theia lirthei leh bungrua dah phal a ni lo.

MLA-in hawng

Aizawl South-II bialtu MLA Lalchhuanthanga chuan May 27, Inrinni khan hun rei tak lo hluihlawn tawh Lungli - Sikulpuikawn step siam thar a hawng. MLA chuan a fund hmanga hna ṭha tak tak thawh a ni ṭhin chu a lawm thu sawiin, "Pawisa hi a nihna ang taka hman a nih chuan hna ṭha tak thawh theihna a nih zia vawiina Mission Veng LC hnathawh hian a tarlang," a ti.

Kutthlak rih loh duh

Pawl pathum - INTACH Mizoram Chapter, Aizawl Hmathlir leh Aizawl Mihlun Thlahte chuan thuchhuah siamin, "Assam Rifles-in Aizawl khawpui laili lai leh a chhehvela an ram luah an chhuahsan fel hma chu heng lai ram chhungah hian mimal leh sorkarin kutthlak rih lo se kan ti," an ti.
Aizawl Bawrhsap Pisapui chu a kan hmaa a hmelhmang lan dan anga sak ṭhat leh ni se an duh thu pawl pathumte hian an tarlang bawk.