NH-306(A) zauh tura zangnadawmna inpekah dik lo a awmah MJA-in an ngai

MJA, Kolasib district chuan, National Highway no. 306(A) Vairengte-Aizawl inkar kawngpui zauhna tura ram lak leh zang­nadawmna pek chung­changah thil dik lo a awm ngei nia an ngaih thu an larlang.

Kolasib MJA member-te chuan an president Andrew Vanlalauva hoin May 27, Inrinni khan NH-306(A) Vairengte-Aizawl kawngpui zauh tura ram lak leh zangna­­dawmna pek chungchang RTI Act tlawh­chhana an zawhna chhanna an dawn chu a dik leh dik loh an enfiah a; Bilkhaw­thlirah kalin, khaw­tlang hruai­­tute an kawm kual bakah, a hmun­­ah ram an ­enfiah a ni.

MJA, Kolasib tarlan danin, Bilkhawthlira VC President pakhat chuan Kolasib-a journalist pakhat chu a ṭhianpa a nih angin VC Pass a pek thu a sawi a, "CALA-in min siamsak ve dawn a, tiin min dil a, VC Pass hi dahkhah loh (blank)-in hming ka sign a, ka pe," tiin MJA member-te a hrilh.

Chu chu a hriatpui loh thu sawiin VC Secretary chuan, "CALA (Com­petent Authority for Land Acquisition)-in siamsak tura min ngen angin kan siamsak tih chu ka hria a, tu tute nge kan siamsak ka hre lo. VCP sawi hi ka hriatpui lo," a ti.

Kolasib MJA president Andrew Vanlalauva chuan, kawngpui zauh tura zangnadawmna chungchangah mipui aṭangin sawi neuh neuh a tam thu sawiin, "Hma kan la ṭan chauh a, kan kal zel dawn. Kan thil hmuh leh hriatte hi puanzar zel a ni ang a, a ṭul chuan thuneitute hnenah pawh kan thlen ang," a ti.

Andrew Vanlalauva chuan, Mizorama hmasawnna hna thawh a nih dawn apiangin compensation chungchangah rik luih luih a ni fo tih sawiin, "Mimal tu mah kan bei lo a, kan hmalaknaah mimal hming a lo lang a nih pawhin anmahni kan huat vang a ni lo," a ti a; mi dik lote an fimkhur a, khaw êng pawh zah loa thil tih a bo theih nan hma an la tih a sawi.

KOLASIB MJA TARLAN DANGTE

◉ Zangnadawmna cheng nuai 200 chuang pekna ram pakhat chu zangnadawmna latuin a hmain cheng nuai 60-in a lei a; ram a leina pa chu MJA-te'n thu an zawtfiah. Ram hralhtu chuan, kawngpui kalna tur chin metre 300 vela thui cheng nuai 60-a a hralh thu leh a leituin pawisa a pek tlak nghal vek thu te, ram chu mau hmun a ni a, kuhva tlem azawng a awm thute a sawi. Chutih laiin, kuhva leh thlai chi hrang hrang a awm niin RTI Act zawhna chhannaah tarlan a ni thung.

◉ VC Secretary pakhat chuan Bilkhawthlir Kualmawi YMA Branch-in an enkawl ram - Social Forestry - ram bula kawngpui hlui kalna chu a tirah surveyor-te'n compensation pek tawhna a nih avangin mar' theih a ni lo tih an sawi. A hnuah chu laiah chuan VC pass siam leh a ni thung. Chu ram hmang chuan mi pakhat hnenah zangnadawmna pek a ni a, kuhva kung puitling eng emaw zat a awm tih RTI zawhna chhannaah tarlan a ni.

◉ YMA hruaitu pakhat chuan Social Forestry huam chhungah YMA hmingin zangnadawmna lak tur ang an la a, la lak loh hlawm khat an la nei bawk. Chutih laia Social Forestry hmuna mi pakhat hminga VC pass a awm ve chu an hrethiam lo. CALA an zawtfiah a; CALA chuan surveyor-te'n an teh a, ram awl a awm avangin mi pakhat tan pass siamsak a nih thu an lo hrilh. Chutih laiin, Social Forestry atan tun hmain mi eng emaw zatin an pass an surrender tawh a ni.