Hydroelectricity Power Plant lian deuh din turin kawng zawn a ni dawn - Union Power Secretary
Governor Dr Hari Babu Kambhampati leh sorkar laipuia Ministry of Power secretary Alok Kumar-te chu May 27, Inrinni khan Raj Bhavan-ah an inkawm. Union Power Secretary chuan, Mizoramah kawlphetha siamchhuah belhna turin Hydroelectricity Power Plant lian deuh din tura kawng zawn a nih dawn thu a sawi.
Governor Dr Hari Babu Kambhampati chuan, Union Power Secretary chu Mizorama kawlphetha siam chhuah dan tur kawng zawnpui turin a sawm a, "Mizoramah kawlphetha tam tham tak siam theihna tur lui luang nei mah ila, sum lamah harsatna kan tawh avangin kawng dang dapin Union Power Minister leh Mizoram Power Minister te pawh ka lo hmu tawh ṭhin," a ti.
Power siam chhuah kawngah hnathawh theihna a nih dawn chuan Central PSU-te pawh sawm luh maia finthlak thu leh Mizoramin kawlphetha hman tur khamkhawp a neih hunah chuan thil siam chhuahna hmun tam tak a awm belh ang a, state revenue pawh a pung dawn niin Larsap chuan a sawi bawk.
Alok Kumar chuan, Mizorama Power & Electricity hotute nen an inkawm thu Larsap a hrilh a, "Kan sawihona êng aṭangin Mizoramah kawlphetha siamchhuah belhna turin Hydroelectricity Power Plant lian deuh din tura kawng zawn a ni dawn. Hydel Project megawatt 200 chin tal loah chuan êng chhit man unit khatah cheng tam tak chawi a ngai a, a fuh lo," a ti.
Hydro Power plant din dawn chuan MW 200 chunglam en a ngaih thu sawiin Union Power Secretary chuan, "Hetiang MW pechhuak chinah chuan unit khat hralhna man pawh a chawitu tan a zia awm deuh a, Hydel Plant tê deuh din chu thil tih chi niin ka hre lo," a ti a; Mizoram Power & Electricity hotute chu an veng vain, project lian tham enkawl turin experience an nei ṭha tawk nia a hriat thu a sawi bawk.