MNF-in zalenna a sual char char niin sawi

MNF Media & Publicity dept. bultumin May 27, Inrinni khan MNF-in zalenna an sual laia hruaitute zinga mi col. Lalrawnliana leh C Zahmuakaten thuthar thehdarhtute an kawm a, inremna siam a nih hma kha chuan MNF-in zalenna an sual char char thu an sawi.

Col. Lalrawnliana chuan tunlaiin Zoramin zalenna a sual laia tel ziktluak ve ta lo, a dumpawl tia vuah zinga mi ṭhenkhatin, anmahni zalenna sualtute zing aṭanga an tlanbo hnuah khan 'MNF kal zelte khan zalenna an sual tawh lo' tiin mualphona leh hming chhiatna hliahkhuh tumin, dawt an sawi chhuak ṭhin tih a sawi a, "Hei hi dawt a ni. MNF hian zalenna a sual char char a, khawvel media hrang hrangahte pawh MNF chanchin hi chhuah a ni," a ti.

Tuna zalenna an sual lo titute chu tuman ram hruai tlaka an thlan lem loh, mi fel ve tak an ni ve mai nia sawiin col. Lalrawnliana chuan, "Hetianga mi dang bei bei tur hian an ropui lem lo, Pathian ruat an nih hmel loh khawp mai. Pu Laldenga an beih an beih pawh hi an aia mipui thlan leh duh zawk daih a ni, lo phun lungawi ve mai mai rawh se," a ti a, zalenna an sual lo titute thu leh hla ui benga hlin tlak a awm loh thu a sawi.

C Zahmuaka chuan March 1966 khan MNF founder president Laldenga hoin mi 61 te chuan Mizoram chu India laka indanga amaha ro inrel turin independence puangin hming an ziak, "Mizoramindependence puan hi khawvel ram zawng zawng hriat theih turin Pakistan radio-in a puang hmasa ber. Chumi hnuah BBC, VOA, Far East Broadcasting Company (FEBC), Manila ten an puan hnuah China khawpui Peking Radio pawhin a puang zui," a ti

MNF sipaiten Mizoram chhunga Assam Rifles post hrang hrang an lak lai mekin Aizawl Assam Rifle post an hualbeh tlat chu jet fighter-in namen loin Aizawl khawpui chhung leh hmun pawimawhah bomb thlakin ral beih takin Mizote chu min bei nia sawiin C Zahmuaka chuan, "Hemi avang hian Aizawl khawpui chhung hmun pawimawhte pawh nasa takin a kang ta a, nunau leh mipui te pawh hlau hlawpin an chenna in an chhuahsan ta a ni," a ti a, hengte hian Mizoram chuan India lak aṭanga in lak hran ngei a tum zia a tih lan thu a sawi.