Zirtirtu, nu leh pa leh zirlaite harh thar a ṭul takzet - HTE Minister

Higher & Technical Education (HTE) minister Dr R Lalthangliana chuan May 27, Inrinni khan Darzo Community Hall-ah 'Quality on Education Awareness Campaign' a hmanpui a; South Vanlaiphai PHC a tlawh a bawk. Minister chuan thiamna tak tak chhawr tlak nei turin zirtirtu, nu leh pa leh zirlaite harh thar a ṭul thu a sawi.

Hnahthial district Samagra Shiksha-in Darzo Community Hall-a 'Quality on Education Awareness Campaign'an buatsaih a hmanpuinaah HTE minister Dr R Lalthangliana chuan, "Enga tinge Mizoram pumah chhawr tlak thiamna nei kan tlem tak em em tih hi ka zawhna a ni. Thiamna tak tak chhawr tlak nei turin zirtirtu, nu leh pa leh zirlaite harh thar a ṭul takzet," a ti.

Dr Thangtea chuan a bial chhungah HSLC leh HSSLC pass vekna sikul an awm nual chu lawmawm a tih thu a sawi a, "MLA bial danga an la tih ngai loh, he lai bialah hian thiamna tak tak paw chhuak thei tura naupangte inchher chhoh dan tur zirtir a, mi thiamte sawma infuihna neiin career guidance ka buatsaih ang," a ti a, tunlaiah thiamna pangngai ringawt ni lo, thiam filawr chin nih a ngaih tawh thu a sawi.

South Vanlaiphai PHC a tlawhnaah thawktuten mamawh hrang hrang an sawite chu a ṭul ang zela hmalaksak an nih tur thu Health Minister chuan a sawi a, PHC-a awm damlote kan nan pawisa a hlan.