ZORO-in Zofate Inkhawmpui Lian leh Inpumkhatna kawng zawh huaihawt

Zo Reunification Organisation (ZORO) chuan May 27, Inrinni khan Aizawlah 'Zo Hnam Inpumkhatna Kawng Zawh' leh 'Zofate Inkhawmpui Lian' an huaihawt.

Chawhma lamah Zo Hnam Inpumkhatna Kawng Zawh an huaihawt a, Millenium Centre kawt aṭanga Vanapa Hall kawt thleng kawng zawh niin, 'Kan unaute tawrhna hi kan tawrhna a ni' tih leh 'Zofaten eng nge kan duh? Insuihkhawm' tihtein au rual a ni.

Chawhnu lamah Vanapa Hall-ah Zofate Inkhawmpui Lian ni hnihna an hmang a, Rajya Sabha MP K Vanlalvena'n a hmanpui.

K Vanlalvena chuan, MNF khan independent a sual a ni mai loa, rorelna pakhat hnuaiah Zofate hruailuh a tum tih sawiin, "Chuvangin, kan chhehvela hmun dangte pawh a bei ṭhin. A tir aṭanga MNF in a tum ngar ngar chu India nena inremna a lo awm tak avangin, Zofate insuihkhawm duhtu ZORO movement a lo lian ta a ni," a ti.

Inkhawm hi ZORO vice president Moses Lalramchhana'n kaihruaiin, political party hrang hrang aiawhte pawhin thu an sawi.