Mizoram mipuite hmangaihna a ṭha thei ang bera chhanglet turin raltlante chah

MZP leh Chin Baptist Church USA ṭangkawp chuan May 27, Inrinni khan Manipur buaina vanga Mizorama rawn raltlan Ṭinghmun, Sakawrdai leh Vaitin khuaa awmte ṭanpuina an pe a; MZP president Lalnunmawia Pautu chuan Mizoram mipuite hmangaihna a ṭha thei ang bera chhanglet turin a chah.

Raltlante nen an inkawmnaah MZP President chuan, sahimna zawnga Mizoram rawn kalte chu Mizoram kohhran hrang hrang te, NGO hrang hrangte leh political party hrang hrangten inlungrual taka an lo dawnsawn thu leh an lo enkawl thu sawiin, Mizoram chu Zofate Jerusalem a nih avangin thlamuang taka awm turin a chah.

Lalnunmawia Pautu chuan Mizoram mipuiten hmangaih taka an enkawlna chu a ṭha thei ang bera chhanglet tura chahin, "Mizorama in awm chhungin khua leh tui ṭha tak ni ang che u," a ti.

Ṭanpuina hi Ṭinghmun branch YMA-ah buhfai bag 12, Rs 5,000 leh eitur chi hrang hrang; Sakawrdai relief camp-ah buhfai bag 15, Rs 5,000 leh eitur chi hrang hrang leh Vaitin VC-ah buhfai bag 3, Rs 2,000 leh eitur chi hrang hrang hlan a ni.