Inthlan dawna a intiamna tihhlawhtlin nei mang loah Prime Minister puh

All India Congress Committee (AICC) spokersperson Mathew Anthony chuan May 27, Inrinni khan Congress Bhavan-ah thuthar thehdarhtute kawmin, prime minister Narendra Modi chuan kum 2014 inthlan dawna a intiamna tihhlawhtlin a nei mang lo niin a sawi.

Mathew Anthony chuan, BJP sorkarna hnuaiah thil man a to chak hle tih sawiin, "Corruption pawh a hluar hle. Prime Minister ṭhianpa Adani an duhsak em em a, mi an retheih tulh tulh laiin, kan PM ṭhiante chu an hausa tulh tulh a ni. Hna nei lo pawh an pung nasa tawh hle. Ram hnuk khawih tak takah a ṭawng chhuak duh ngai lo. Manipur buainate hi serious hle mah se, a ngawi tlat," a ti.

AICC Spokesperson chuan BJP-in kum 9 an sorkar chhungin sorkar hmasate hmalakna tam tak chu a kalphung thlak chuang loin a hming chauh thlakin anmahni tihchhuah ang deuh thawa sawi chungin a kalpui nia sawiin, "Thusawi thiam tak Narendra Modi hian kum 2014 Lok Sabha inthlan campaign laia mipui hmaa a intiamna tihhlawhtlin mumal a nei lo," a ti a, BJP-in zawhna chhan ngam loh tam tak a neih tawh thu a sawi.

AICC Spokesperson hi MPCC president Lalsawta, treasurer Dr Lalmalsawma, spokesperson Dr Lallianchhunga leh general secretary CS Thangate'n an ṭawiawm a ni.

AICC Spokeperson sawi dangte

◆ Pawisa hlutna tlahniam (inflation) lutuk leh hnathawh tur nei lo (unemployment) hi eng vangin nge heti em ema a san? Eng vangin nge mi hausa an hausak tulh tulh a, mi retheite an retheih tulh tulh? Sorkar company-te hi Eng vangin nge Modi-a ṭhian ṭhate hnenah hralh a nih leh ṭhin?

◆ Eng vangin nge India ram loneitute hamṭhatna tura dan siamte zawm a nih loh? Eng vangin nge minimum support price hi dan hmanga thuam chak a nih loh? In intiam ang khan loneitute sum lakluh hi a letin an ti pung thei ta em?

◆ Eng vangin nge mipuite’n rim taka an thawh chhuah sa LIC leh SBI a an dahte Modi-a ṭhianṭha Adani hlawkna tura hman a nih? BJP rorelna state hrang hranga eirukna nasa takte hi Eng vangin nge beng an hup san?

◆ Eng vangin nge China hian kum 2020 hnulamah India ram zau tak a la luah luih reng, Modi-a’n June 19, 2020 a a thusawi kha China hian eng atan mah a ngai lo tihna em ni? Ṭum 18 zet inbiakna neih tawh hnuah pawh Eng vangin nge China hian India nena inbiakna thuthlung a zawm duh miah loh? India himna hi China lakah intiderthawng reng dawn em ni?

◆ Eng vangin nge inthlana chak in duh vanga engpawh huama in duh ang duh ve lo emaw in lamṭang ni loa inhriatte tihchhiat vek tuma hma inlak ṭhin le? Hei hian India khawtlang nunah ‘inhuatna chi’ a tuh a, hnam inpumkhatna a tiderthawng tih an hre lo em ni?

◆ Eng vangin nge hnam leh sakhua intluktlanna tiderthawng zawnga hma in lak, India ram hi sakhaw tenau zawkte tan ram him lo takah in siam mek tih an hria em? Hmeichhiate, hnam hnufual leh hnam tlem zawkten harsatna an tawh laiin Eng vangin nge BJP sorkar hi a ngawih tlat ṭhin le?

◆ Eng vangin nge India ram democracy lungphum tinghing zawnga hma an lak ṭhin? Eng vangin nge eptu party hruaitute lakah phuba lakna politics (revenge politics) kalpui tuma sorkar thachakna an hman ṭhin le?

◆ Eng vangin nge hnam hnufual leh tribal-te hamṭhatna hrang hrang dawn turah sum an dah tlem tulh tulh mai le?

◆ Covid-19 hripui vangin India ramah mi nuai 40 chuang an boral a, heng mite tan zangnadawmna (compensation) tur hi engvanga siam lo nge an nih? He hripui vanga eizawnna tawp mi nuai tam tak te khaichhuahna turin ruahmanna siam an nei miah lo em ni, kumtin hna thar vaibelchhe 2 siam an intiamnate kha an theihnghilh ta em ni?