VC/LC inthlan tur atan inpuahchah
August 27, 2020-a village council (VC) leh local council (LC) inthlan tur atan district hrang hrangah inbuatsaihna kalpui mek a ni. Aizawlah chuan nimin khan DC conference hall-ah political party-te tan training buatsaih a ni a, election officer V Lalmuanpuii'n kaihruaiin, master trainer pahnih Christina Lalmuanzuali leh R Lalrinzualite'n Model Code of Conduct, Mizoram Prevention of Defacement of Property Act, 1995, VC leh LC inthlan vuakvêt (August 4 - September 7, 2020) chhunga inkaihhruaina leh vote thlak nía lirthei hman dante an sawifiah.
Serchhipah chuan DC meeting hall-ah political party hrang hrang aiawh te, NGO Coordination Committee aiawh te, MJA leh MPF aiawhte tan VC inthlan tura Model Code of Conduct chungchang inhrilhfiahna hun buatsaih a ni. Meeting kaihruaitu Kumar Abhishek, DC chuan, inthlanna thianghlim leh felfai tak a awm theih nan thawhpuiah meeting-a telte a sáwm a, "Tun hma aṭang tawhin Mizoramin inthlanna muanawm a neih ṭhin vangin a hmingṭha ṭhin a, chu hmingṭhatna chu chhawm nung zel tura kan inbuatsaih a ṭul," a ti a; MPF leh MJA tlawmngai pawlte chu ṭha taka sorkar thawhpui zel turin a ngen.
He hunah hian assistant district election officer Vanlalhmachhuana'n Model Code of Conduct a sawifiah a, addituional SP PC Lalṭanpuia'n venhimna lama inbuatsaihnate a sawi bawk. Kolasib-ah chuan IPR conference hall-ah VC inthlan tura returning officer (RO) leh village level officer (VLO)-te tan training buatsaih a ni a, district bawrhsap Dr H Lalthlangliana'n a hmanpui. Bawrhsap chuan, inthlannaa mawhphurhna neite chu an hnate phurrita ngai lo tur leh phûr leh zângkhai tak, fimkhur tak chung sia thawk turin a chah a, "RO leh VLO-te hi mahni bial ṭheuhah mawhphurhna pawimawh tak chelhtu in nih angin, sorkar buatsaih inthlanna dan bute in chhiar tam a ngai a ni," a ti.
Kolasib-a training-ah hian RO 56 leh VLO 56 an tel a; BDO Neng Thianlala'n nomination file dan leh vote chhiar dante a sawifiah a ni. Kolasib District Level Standing Committee on Election to Village Council, 2020 pawh nimin khan an chairman, DC Dr Lalrozama hoin DC conference hall-ah an ṭhukhawm a, Tripura-a Bru-te chuan vote an thlak duh a nih chuan an khuaah polling booth siam a nih dawn loh avangin an parent VC-ah vote an thlak a ṭul dawn thu tarlan a ni. Dr Lalrozama chuan kan hmalawkah VC inthlan lo awm tura hlawhtling taka election neih a nih theih nana inpuahchah dan tur sawiho tura inkokhawm an nih thu sawiin, department leh political party-te chu an mawhphurhna a hriattir nghal.