ASF hrilênna hmun panga a awm; Vawk 84 a thi a, 136 suat a ni tawh

Vawk pùl hri, African Swine Fever (ASF) vangin kuminah Mizoramah vawk 84 a thi tawh a; ASF vang hian kum 2021-ah vawk 33,417 leh kum 2022 khan vawk 12,791 a thi a ni.

AH&Vety department aṭanga Vanglaini thudawn danin, kuminah hian Mizoramah ASF vangin Champhai district-a Ngur, Kelkang leh Zote khua bakah Champhai khawpuia Zion Veng leh Vengthlangah ASF hri a leng tih finfiah a ni tawh a; hmun dangah a lèn hriat ala ni lo.

Champhai District Magistrate chuan May 5, 2023 khan Ngur khua chu ASF hri lenna (infected area)-ah a puang a, hemi hnu hian khua/veng paliah hri hi a leng tih finfiah leh tawh a ni. Heng khua/veng pangaah hian nimin thleng khan ASF vangin vawk 84 a thi tawh a, khua/veng pahnihah vawk 136 suat a ni tawh.

ASF hi Mizoramah chuan kum 2021 March thla khan Lunglei district-a Lungsen khuaah a vei an awm tih hmuh chhuah a ni a, he mi kum hian district 11-a khua/veng 272-a chhungkaw 9,671-te vawk 33,417 a thi. Kum 2021 chhung vêk hian ASF vangin vawk 12,568 suat a ni.

Vawk pùl hri hi kum 2021 kumtawp leh kum 2022 kum tir lamah khan a reh deuh a; February 4, 2022 khan Champhai district-ah leng ṭan lehin kum 2022 chhung khan ASF vangin vawk 12,791 a thi a; vawk 11,594 suat a ni leh bawk.

March 2021 - September 2022 thleng khan ASF vang hian Mizorama vawk vulhtute'n cheng vbc. 534.52 vel an hloh nia hriat a ni.