CM leh minister ṭhenkhatin bial dang an melh - ZPM Secretary General

ZPM chuan nimin khan an pisa-ah chhung inkhawm an hmang a, thusawitu ZPM secretary general PC Vanlalruata chuan Chief Minister leh minister ṭhenkhatin bial dang an melh mek niin a sawi.

PC Vanlalruata chuan tunlai hian sum leh pai hman dik lohna avangin rorel lai MNF an buai hle nia sawiin, "Chhungkhat laina induhsakna uchuak avangin party workers tam tak an beidawng mek. CM ni mek leh minister ṭhenkhat mahni bial ngaia ding nawn ngam loa bial dang zawng mek an kat nuk," a ti.

ZPM Secretary General chuan Congress chhungkuaah harsatna namen lo a thleng mek tih sawiin, "Team thar din tum leh ex-MLA rual an in Mu leh Ar mek a ni. Heng boruak zawng zawng hriat hian ZPM tan kawl a êng hle," a ti a, Pathian duh anga an party-in ke an chheh fuh loh palh chuan chunglamin sorkarna a pek loh theih thu a sawi.

Ram mipuite duh leh hmuh chak ber chu mipui sorkar dik tak a nih thu sawiin ZPM Secretary General chuan, "State kan nih aṭangin Congress Party-in kum 20 leh MNF-in kum 16 chuang ro an rel tawh. Kan dinhmun chu mipuiten kan hre tlang vek a ni. Vawiin hian mipuiin sorkar siam turin ZPM min beisei mek," a ti.