Zoramthanga kaihhruai hnuaiah kan sorkar leh dawn - Dr R Lalthangliana
MNF Sub-Headquarters, Lunglei chuan nimin khan Convention Centre-ah thawktute infuihtharna leh mithar lawmluhna hun an buatsaih a, an hun hmanpuitu MNF adviser Dr R Lalthangliana chuan Zoramthanga kaihhruaina hnuaiah an sorkar leh ngei dawn niin a sawi.
Dr R Lalthangliana chuan kum 30 zel MLA a ni ve tawh tih sawiin, "Tuna kan chief minister Pu Zoramthanga kaihhruaina hnuaia MLA-te hi kan lungrual em em a, tun ang tluka bial vil ṭha leh taima MLA an awm ka la hre ngai lo. Pathian leh mipui zarah Pu Zoramthanga kaihhruaina hnuaiah MNF hi kan sorkar leh ngei dawn a ni," a ti.
Politics-ah chuan rilru dik leh hrisel put chu a harsa lai ber a nih thu sawiin MNF Adviser chuan, "Malsawmna dawng tur erawh chuan rilru dik leh hrisel put ngei ngei a ngai. Min beitute min beihna, Pu Zoramthanga kaihhruai sorkarin engmah ti lo ang maia min chhuah hi pawm loh thiam mai tur," a ti a, an thil tih leh hmasawnnate an hmuh leh hriat tur a awm thu a sawi.
Dr R Lalthangliana chuan a chan department kaihhnawih meeting-ah a tel nasa thu sawiin, "He ta an sawi zin ber chu state tinah development leh sorkar hna lak kawngah tun thlengin Covid khan min la nghawng zel a ni. Mizoramah pawh Covid do nan khan budget-a awm lo, cheng nuai hlir nuai singhnih chuang kan hmang a, Health Minister ka nihna angin an ziah tel loh pawh ka hmu nual," a ti.
Thusawitu dang, MNF MLA Lalrintluanga Sailo chuan LMC leh Zemabawk VC by- election kha awm lo se, kumin kum tawp inthlan hian MNF an tla palh maithei nia sawiin, "LMC-a kan tla kha Pathianin min ben harhna a ni a, a lawmawm hle. Social media-ah ZPM-ten dawta sual tinrengin MNF min hek a, MNF worker-te insawifiah ve loin kan ngawi mai mai," a ti a, tunah chuan dawt leh sual tinrenga an heknate an sawifiah ve tak thu a sawi.
MNF thuchhuah tarlan danin, inkhawmah hian MNF adviser Dr R Lalthangliana'n an party-ah mi 942 a lawmlut. Lunglei East bialtu MLA Lawmawma Tochhawng leh MNF Sub. Hqrs., Lunglei president Vanlalhmuakate pawhin thu an sawi.