Vote lei tumte Mizoramin a mamawh lo - MPCC President

Hrangtûrzo West Block Congress chuan nimin khan Khawlailung community hall-ah khawmpui an hmang a, an hun hmanpuitu MPCC president Lalsawta chuan inthlan dawna vote lei tum ṭhinte Mizoramin a mamawh loh thu a sawi.

Lalsawta chuan candidate atan hausa ringawt an thlang dawn lo tih sawiin, "Mi dik leh mi rinawm, ram leh hnam tana a ṭha ber ber kan rawn vawrh chhuak dawn. Campaign-na tura chêng nuai 200, nuai 300 ka nei tawh ti hote hi chu Congress Party hian ti beidawng teh ang u. Kumin hi a bulṭanna atan hmang ila, sum hmanga vote lei tumte chu lo ti zak ula, lo hnawl ngam zel turin ka ngen che u. Hetiang mihring hi Mizoramin a mamawh lo," a ti.

ZPM-in kalphung thar tih hi an sawi fo tih sawiin MPCC President chuan, "A sawia sawi ai chuan a taka tih a pawimawh zawk. Kei pawh hi Pu Lal Thanhawla'n president ni ve tawh rawh se min ti a, khawi daikil kara mi nge tih pawh in hriat loh kha president ka rawn ni ve ngawt a, chu chu kalphung thar chu a ni. Hruaitu ṭhain hruaitu ṭha dang a chher chhuak ṭhin," a ti a, inthlak danglamna a thlen thu a sawi.

Lalsawta chuan ni tin ṭawng­ṭainaah 'I ram lo thleng rawh se' tih an chham ṭhin tih sawiin, "Kan ramah hian Pathian ram tak tak a lo thleng em? Pathianin ram ṭha min pe a, mihring ṭha min pe bawk. Mipuiin kan nghah mek chu sorkar ṭha a ni. He sorkar ṭha pe tur che u hian Congress party hian kawng dik kan kawhhmuh che u," a ti a, an party-a lut zel turin Mizo mipuite a sawm.

MPCC President chuan ṭang puihna an sem dawn lo a, an pe dawn zawk nia sawiin, "Ṭang tak takte kan pui dawn. Kan ṭan tam poh leh kan ram a ṭha ang a, kan thawhchhuah a lo tam ang a, ramin hma a sawn phah dawn a ni. Phai aṭanga chawhmeh rawn lut zawng zawngte hi kan enfiah ang a, intodelh dan kan zawng ang. Kan manifesto angin Mizo hnam hi hnathawk hnam ni turin kan siam ang a, mi taima hlawhtlinna atan chuan sum kan dah dawn a, thil harsa a ni reng reng lo," a ti.

Hrangturzo Congress resolution :

1. MPCC thuchhuah tarlan danin, Lalsawta hian Keiṭum, Hmunzawl, Piler, Bungtlang leh Chekawn khua aṭangin an party-ah mi 106 a lawmlut.

2. MPCC president Lalsawta'n Mizoram Pradesh Congress Committee (MPCC) a kaihhruai dan hi ṭha kan tiin kan ring tawk. Mizoram tana a hmathlir hi Congress party tan chauh ni lo, Mizoram tana ṭha, hmasawnna thlen thei tur leh dinchhuah pui tham niah kan ngai a ni. Chuvangin, sokar ṭha siam tura Lalsawta kaihhruaina hnuaia lungrual taka theihtawp chhuaha hmalak zel nise kan ti

3. Kum 2023 MLA General Election lo awm turah Hrangturzo biala ding tur kan hotuten an rawn dah apiang lawm takin kan pawm a, an tlin ngei theih nan theihtawp kan chhuah ang