KHAWTHLIR

CM-in kawm
 New Delhi-a cham mek chief minister Zoramthanga chuan May 28, Pathianni khan prime minister Narendra Modi, union Finance minister Nirmala Sitharaman leh minister of state for DoNER BL Verma-te leh nimin khan Union Road Transports & Highways minister Nitin Gadkari a kawm a; Mizoram hmasawnna tur project hrang hrang a sawipui.

Green Mizoram Day
Mamit District Level Committee on Green Mizoram chu an chairman VL Remliana, bawrhsap hoin nimin khan DC conference hall-ah an ṭhukhawm a; June 9, 2023-a Green Mizoram Day hman dan tur an rêl. Day pualin Bawngva kawngah thingphun ni se; thingphun enkawl zui ṭha (50% chin phun nung)-te hnenah lawmman pakhatna Rs 5,000, pahnihna Rs 3,000 leh pathumna Rs 2,000 pek ni se, an ti.

In kâng
Tukin dar 3 bawr vel khan Ramlaitui, Lunglei district-a R Lalchhuankimate chenna in Assam type chu a kâng a, bungraw chuh hman lohin a kâng ral vek. In kan chhan hi electric current kalsual nia rin a ni. R Lalchhuankimate chhungkua hi Thenzawla an awm lai a ni a, an ṭhenawmten in kang an hriat chuan a lo kan nasat tawh avangin ṭhelh theih a ni lo.

Paih khap
Lunglei sub-divisional magistrate Alan Lalthanzara chuan Pukpui ram chhung, Pialthleng lui hnar, Aizawl road Char lui leh ṭawngṭaina inkar kawng thlang lamah bawlhhlawh leh ran thi ruang paih khap a nih thu a tarlang a, thupek zawm lote chu IPC Section 188 hmanga hrem an nih tur thu a tarlang bawk.

Zirlai chawimawi,
Mizo Zirlai Pawl (MZP) Hqrs., Biate chuan nimin khan an khua-a Zialung Community Hall-ah zirlai tiṭha chawimawina hun an buatsaih a, Khawzawl BDO Lalṭhakima Chhangte leh MZP asst. general secretary Chinkhanmanga Thomte-ten an hmanpui. Biate MZP hian HSLC leh HSSLC distinction leh first division-a pass zirlai 13 chawimawina an hlan.

ZORO-in sawm
Zo Re-unification Organisation (ZORO) chuan Zofa Inkhawmpui Lian an buatsaih chu nimin khan an thlirlet a, programme tih hlawhtlin nana hun leh thâ leh sum leh pai thawtute inpeknaah lawmthu sawiin, "Zofate inpumkhatna leh rorelna hmun khat hnuaia kan kùn za theih nana mahni theihna hmun ṭheuhah ṭan la turin Zofa zawng zawngte kan sawm nawn leh a che u," a ti.