Mizoram House tihral tum chungchangah MPYCC-in Chief Minister thurâwn an pe

Mizoram Pradesh Youth Congress Committee (MPYCC) chuan nimin khan Ballygunge, Kolkata-a Mizoram House tihral tum a nih chung chang­ah chief minister Zoramthanga lehkha thawnin, thurâwn an pe.

MPYCC-te hian an sr. vice president Ngur­dingpuia Pachuau hoin Chief Minister hnenah hian lehkhathawn an tum a, a awm loh avangin a PS-in a lo dawn sak.

An lehkhaah hian Ballygunge-a Mizoram House tihral tum a ni tih leh e-tender hmanga hralh tum a ni tih an lo hria tih tarlangin MPYCC chuan, "Ṭha kan ti lo nachungin kan do ngawr ngawr lo. Amaherawhchu, tihral a nih hma hian hralh a ngaih loh nana tih theih awm ang angte tih hmasak phawt ni se kan ti. Kolkata Municipal Corporation hnuaia an building regulation (G-3) hi inngaihhnathiamna awm thei lo tawp a nih kan ring lo," an ti.

MPYCC chuan Salt Lake-a Mizoram House sak a nih dawn pawh khan tuna sak a nih ang thlap khuan sak phal a ni lo mah se, khatih hun laia kan Chief Miniser, Lal Thanhawla khan hriatthiamnate dilin tuna an sak ang khuan sak an phalsak ta tih tarlanin, "State pakhat dilna chu an zahsak em em ang tih kan ring tlat," an ti a, sorkarin hralh a tum chhana an tarlante chu chhuanlam mai mai nia an ngaih thu tarlang.

Kum 2019-a sak ṭhat lehna tur ruahmanna leh phalna pawh a awm hma hauha a in (building) ṭhiah a ni kha pawi an tih thu tarlangin MPYCC chuan, "Tu emaw hlawkna tur niawm taka lang theia khatia engmah tihfel a nih hma leh luah tlâk a la nih reng laia ṭhiah a ni kha pawi kan ti em em. Khatianga mimal hlawkna tura tih nia lang theia thil a kal kha thleng leh ngai tawh lo se kan ti hle a ni," an ti.

MPYCC hian CM hnena an lehkhathawnah hian Manipur aṭanga Zo hnahthlak rawn raltlante sorkarin chhawmdawl se an duhthu leh central aṭanga Covid ṭanpuina sum ṭum riat lokal, a vaia belhkhawm cheng vbc 79.62 leh CM relief fund-a lut cheng vbc. 26.79 hmanna mipui hnena puangzar tura an phûtna an tarlang tel.

MPYCC duh dan :

1. Mizoram House tihral a nih hma hian a aiawh zo tur hmun (ram) thlan fel hmasak emaw, hauh fel hmasak a, a neitute biak fel hmasak vek phawt

2. A aiawh tur ram man (price) leh a building sakna tur zat hriat hmasak phawt a, chumi khuh theihna tura hralh

3. A ram hralhnaah hian man ṭang ei awm thei lo tura tih

4. Ballygunge Mizoram House Survey Team, Mizoram sorkarin a din a nih chuan tute nge an nih tih leh an hmuhchhuah mipui hriata tlangzarh