Hun harsaah Pathianin min sorkar tira CM vangin kan kal ṭawk ṭawk - MNYF President

Mizo National Youth Front (MNYF) hruaituten tunhnaia MNYF block hrang hrangte an tlawh chhuahnaah an president Dr L Thangmawia, MLA chuan hun harsaah Pathianin MNF a sorkar tir tih sawiin, "Kan chief minister Pu Zoramthanga vangin kan kal ṭawk ṭawk," a ti.

MNYF President chuan, eptu pary-ten chief minister Zoramthanga chu an puh dan ang em ema ṭha lo nise Pathianin a CM tir loh tur thu sawiin, "Kan unau raltlante tan CM hi kan nu leh pa ni tura Pathian remruat a ni. Hnam thilah CM hi a tlan chhe ngai lo. MNF hian Zofate tan international politics kan khel mek," a ti a, Zofate rorelna pakhat hnuaia an awm theih nan an thawh mek thu a sawi.

Tun inthlan lo awm turah an sorkar leh ngei dawn nia sawiin Dr L Thangmawia chuan, "MNF kan sorkar lo a nih pawhin Congress tho hi Mizoramah an sorkar ang. MNF hi Mizo hnam tan kan kal avang leh kan 'goal' a dik avangin kum 60 kan kal tling thei a ni. ZPM tan sorkar ngaihna a la awm lo, an din dan a fuh lo," a ti.

Dr L Thangmawia chuan ZPM-in tun thleng­in an kal phung thar an sawifiah thei lo nia sawiin, "Kalphung thar an la thupa, kal phung pangngaiin an la kal. Tuna ZPM MLA zawng zawng awm dan hi kalphung pangngai vek a ni. Inthlan a hnai tulh tulh anga, an buai tulh tulh ang," a ti a, ZPM-in an hmaikawr hi an hlip chho zo vek tawh niin a sawi.