Congress ṭhalaite'n báng turin Health Minister Thangtea an phût

State páwn aṭanga Mizorama bungrua phur luttu truck driver leh handyman-te Covid-19 an vei leh vei loh endik chungchangah Congress party ṭhalaite chuan Health minister Dr R Lalthangliana chu dâwt hmag­a mipui bumah an puh a, minister aṭanga báng turin an phût.

Mizoram Pradesh Youth Congress Committee (MPYCC) chuan, Kolasib district-a kawng chhia vanga lirthei táng driver-te chu August 6, Ningani zan leh nimin zinga Rapid Antigen Test (RAT)-a endiknaah Covid-19 vei eng emaw zat hmuh chhuah a ni tih an tarlang a, "Hun rei tak ata tawh Vairengte checkgate-ah bungrua rawn phur luttu apiangte Co­vid-19 test an nei vek ṭhin anga mipuiin kan lo hriat chu dâwt mai a ni a, hei vang hian Mizoram mipui chu dinhmun hlauhawm takah min siam a ni," an ti.

Congress ṭhalaite chuan, "July 1, 2020 khan Kolasib DC conference hall-ah Health minister Dr R Lalthangliana chuan bungraw phur luttute RT-PCR test an inpeih thu a sawi a, hei hi dâwt hmanga mipui thlamuanna mai a ni tih a lo lang ta a ni," tiin, Health Minister chu báng turin an phût a ni. MPYCC tarlan danin, Health Mi­nister-in July 1, 2020 khan Kolasib-ah, 'Ramri páwn aṭanga lo lut, passenger leh bungraw phur lirthei khalhtute pawh RT-PCR test neihpui zel turin sorkar a inpeih,' tiin a sawi a; chutih laiin, Ningani zan leh nimin zingah Hmawngkhawthlir leh Seṭhawn inkara tangkhang driver leh handyman-te swab sample endik chauh a nih avangin, Health Minister thusawi chu dâwtah an ngai a ni.

MPYCC chuan, Health Minister chu Mizoram mipui dâwt hmanga thlamuanah an puh a; mipui himna tak tak mutmawh hnàrmawha neih aiin, mipui hmaa 'publicity' lama tlân chak mai mai a thupui a nihzia a pholangah an ngai bawk. Congress ṭhalaite chuan, Covid-19 test tura swab sample lâkte chu mipui himna atan result an nghah laiin an inkhung hrang tura ngaih a nih laiin, tun hnaiah test result chhuah hmaa mipui vangtlang zinga chhuak an awm fo an ngaimawh thu an tarlang a, "Mipui zinga inkaidarhna thlentu ni thei dinhmuna dingte inthlahdah taka awmte lakah sorkar hian action na tak la tawh rawh se," an ti.