Dy. CM-in Tourist Guidance Information Kiosk leh Sanitary Napkin Vending Machine hawng

Deputy chief minister Tawnluia chuan nimin khan Millenium Centre Atrium-ah Tourist Guidance Information Kiosk leh Sanitary Napkin Vending Machine a hawng a; Sanitary Napkin Vending Machine chu sikul hrang hrang bakah, Aizawl khawpui hmun ṭhenkhatah dah mek a nih thu a sawi

Tawnluia chuan, UDPA department chu khawpui changkanna ngaihtuahtu an nih rualin, mi rethei leh harsa zawkte khaichhuahna leh an hmasawnna ngaihtuah ṭhin an nih thu a sawi a, "Smart city hnuaiah project hrang hrang 30 chuang thawh mek a ni a, Aizawl khawpui hmasawnna kawngah an thawk nasa hle," a ti.

Ram chhung leh pawn aṭanga khualzin veivakten information an mamawhte pholanna Kiosk chu Aizawl khawpui lailia hmun pawimawh leh Lengpui Airport-ah bun a ni dawn thu Dy. Chief Minister chuan a sawi.

Tawnluia chuan Kiosk aṭang hian khualzinten Mizoram chungchang an hriat duhte an hre zung zung thei tawh dawn tih sawiin, "Hmeichhiate tan a ṭul huna an mamawh an lam theihna tur Sanitary Napkin Vending Machine pawh sikul hrang hrang bakah Aizawl khawpui hmun ṭhenkhatah dah mek a ni," a ti a; mipui vantlang hmasawnna tura khawl bunte hi dimdawi thiam tur leh neitu rilru pua humhalh tlat turin mipuite a chah.